Qərb elitası barədə İLAHİYYATÇIDAN SENSASİON AÇIQLAMA - FOTO
“Epişteyn sənədləri mənim üçün bir neçə məsələni bir daha aydınlaşdırdı. Hər şeydən əvvəl bu sənədlərin ifşası göstərdi ki, sadəcə insan olmaq mümkün deyil. Bəzən deyirlər ki, insan ol kifayətdir. Müsəlman, xristian və ya yəhudi olmaq ikinci dərəcəli məsələdir. İnsan olmağın mənəvi əsasları, şərtləri olmalıdır. Biz mənəviyyatımızı əsas götürməsək, mənəviyyatı biologiyamızın fövqünə qaldırmasaq, həqiqi insan ola bilmərik. Biz mütləq mənəviyyatımızı qidalandırmalı, ona böyük diqqət yetirməliyik”.
Xpress.az xəbər verir ki, bu barədə Azərbaycan Milli Elmlər Akademiyasının (AMEA) Şərqşünaslıq İnstitutunun aparıcı elmi işçisi, Azərbaycan İlahiyyat İnstitutunun (Aİİ) dosenti, fəlsəfə üzrə fəlsəfə doktoru Elvüsal Məmmədov bildirib.
İlahiyyatçı-alim qeyd edib ki, Qərb mədəniyyəti dəyərləri, mənəviyyatı heç sayır, insan ruhunun tələblərini nəzərə almır: “Epişteyn sənədləri göstərdi ki, Qərb mədəniyyəti dəyərlərdən qopmuş mədəniyyətdir. Bu mədəniyyət dəyərləri, mənəviyyatı heç sayır, insan ruhunun tələblərini nəzərə almır. Bəli, bu mədəniyyət bizim maddi tələbatlarımızı ödəyir, amma bizim mənəvi tələbatlarımıza bu mədəniyyət cavab vermir. Bizim ruhumuz bu mədəniyyətin qarşısında acdır, o bizim ruhumuzu doydura bilmir”.
E.Məmmədov vurğulayıb ki, mənəvi cəhətdən kasad olan elita dünyanı idarə etmək haqqına layiq deyil: “Epişteyn sənədləri bir daha göstərdi ki, Qərb siyasi, intellektual və mədəni elitası nə qədər mənəvi boşluq içərisindədir. Həmin elita bu mənəvi boşluğu doldurmaq üçün istənilən iyrənc, pis işləri etməyə hazırdır. Ən azı mənəvi cəhətdən belə elita dünyanı idarə etmək haqqına layiq deyil”.
Ərturan İSMAYIL
