Ermənistanda yeni şəxsiyyət vəsiqələri: Yaşayış ünvanları dəyişəcək?
Ermənistan hökuməti əmək müqavilələri üçün tələb olunan elektron imzaların alınması ilə bağlı yaranan çətinlikləri aradan qaldırmaq məqsədilə yeni şəxsiyyət vəsiqəsi sisteminin tətbiqinə hazırlaşır.
2026-cı il yanvarın 1-dən etibarən ölkədə əmək müqavilələri yalnız elektron formada bağlanmalıdır. Bu isə vətəndaşlardan elektron imza tələb edir. Elektron imza isə yalnız şəxsiyyət vəsiqəsi vasitəsilə əldə edilir.
Yeni qaydalar nəticəsində şəxsiyyət vəsiqəsi almaq üçün uzun növbələr yaranıb. Bundan əlavə, elektron imzanın aktivləşdirilməsi üçün mobil operatorlara müraciət etmək zərurəti əlavə çətinliklər yaradıb.
Əmək və Sosial İşlər Naziri Arsen Torosyan hakim “Vətəndaş Müqaviləsi” Partiyasının təşkil etdiyi müzakirə zamanı bildirib ki, vətəndaşlara kifayət qədər vaxt verilsə də, çoxları sənədləşməni son günə saxlayır. Nəticədə, artıq bir neçə aydır şəxsiyyət vəsiqəsi üçün gözləmə siyahıları formalaşıb.
Problemin həlli üçün nazirlik yeni şəxsiyyət vəsiqəsi sisteminin tətbiqini təklif edir. Torosyan detalları açıqlamasa da, sistemin elektron imzaların əldə olunmasını asanlaşdıracağı gözlənilir. Dəyişikliklərin qəbulu üçün parlamentdə növbədənkənar sessiyanın çağırılması planlaşdırılır.
Nazir qeyd edib ki, məqsəd vəziyyəti sabitləşdirmək və elektron imza olmadığına görə vətəndaşların işləmək hüququnun məhdudlaşdırılmasının qarşısını almaqdır.
Xatırladaq ki, daha əvvəl Ermənistanın daxili işlər naziri Arpine Sarkisyan Çexiyaya səfəri zamanı yeni şəxsiyyət vəsiqələrinin istehsal prosesi ilə tanış olub. Yeni sistem üzrə müqavilə 2025-ci ilin aprelində Fransanın DEMIA Identity Security France konsorsiumu və ACI Technology S.à.rl (IN Group) ilə imzalanıb.
