Televiziya karyerasına son qoyan aparıcı: “Kütləvi mədəniyyətdə siz hər zaman məğlub olacaqsınız” - FOTO
“Dəyərli media mənsubları, bizimlə bağlı son xəbəri 2 gündür gündəm etdiniz. Bu əlbəttə ki, bizə qarşı diqqətdən irəli gəlir. Çox sağ olun, minnətdarıq. Müsahibələrdən imtina etdiyimə görə inciməyin, lütfən. Nə deyə bilərdimsə status yazıb izah elədim. Bu, zəhmətimizin, yaradıcılığımızın nəhayət bir peşəkar olaraq özümüzün dəyərdən düşməməsi üçün atılmış addımdır. Həm də bu, AzTv-dən, “Mədəniyyət” kanalından gediş yox, televiziya karyerasından gedişdir”.
Xpress.az xəbər verir ki, bu barədə tanınmış teleaparıcı İlhamiyyə Rza sosial media hesabında bildirib.
O qeyd edib ki, Həmid Herisçi ilə birlikdə media fəaliyyəti bundan sonra fərqli platformada davam edəcək: “Televiziya nə qədər doğma olsa da internet imkanlarına uduzub artıq. Uduzmaya da bilərdi - sosial şəbəkələrdən daha maraqlı kontent hazırlamaqla, kütləvi mədəniyyətə qatılmamaqla, elitar, zövqlü efir məhsulları hazırlamaqla! Bu qədər imkan müqabilində nələr etmək olmazdı ki... Kütləvi mədəniyyətdə siz hər zaman məğlub olacaqsınız. Çünki kütləvi mədəniyyət daha rahat platformalara sahiblənib”.
Aparıcı vurğulayıb ki, kütləvi mədəniyyətin televiziyaya ehtiyacı yoxdur. Onun qənaətincə, sadəcə mədəniyyətdən uzaq fəaliyyətlərini legitimləşdirmək üçün televiziyalardan yararlanırlar: “Bəs siz niyə onlara möhtacsınız? Ədalət naminə deyim ki, Mədəniyyət kanalı bu mövzuda istisnadır. O da, öz profilinə görə başqa cür ola da bilməzdi. Uzun, əksəriyyətiniz üçün maraqsız mövzudur. Şənbə günü “Youtube” platformasında yerləşdirilmiş sonuncu verilişimizə 290 baxış, 17 bəyənmə, 1 şərh gəlib. Verilişin mövzusuna, keyfiyyətinə zərrə qədər şübhəm yox! Amma bu, o deməkdir ki, bu verilişə, bu mövzuya maraq yoxdur. Siz də deyirsiniz niyə getdiniz, meydanı kimlərə qoydunuz. Fikirlərimin təhrif edilməsi ehtimalını istisna etmək üçün əksəriyyətinizin verdiyi eyni suala da elə buradan cavab yazıram: bizim bu qərarımızın Mehriban Ələkbərzadə ilə heç bir əlaqəsi yoxdur”.
