2025-ci il üzrə ən fəal İctimai Şuralar - SİYAHI + FOTO
Vətəndaş cəmiyyətinin dövlət idarəçiliyində rolunun gücləndirilməsi, ictimai nəzarətin və ictimai iştirakçılığın təşviqi məqsədilə “2025-ci il üzrə ən fəal İctimai Şura hansıdır?” mövzusunda onlayn sorğu keçirilib.
Xpress.az xəbər verir ki, sorğu “İnformasiya və Sosial Təşəbbüslərə Dəstək” İctimai Birliyi tərəfindən keçirilib və ictimaishura.az platforması üzərindən İctimai Şura (Public Council) brendi çərçivəsində təşkil olunub.
Sorğu çərçivəsində müxtəlif nazirlik və dövlət komitələri yanında fəaliyyət göstərən İctimai Şuraların fəaliyyəti ictimai rəy əsasında qiymətləndirilib. Respondentlər təqdim olunan siyahıdan 2025-ci il ərzində daha fəal, açıq və effektiv fəaliyyət göstərdiyini düşündükləri İctimai Şuranı seçiblər.
Sorğu 05-15 fevral 2026-cı il tarixlərini əhatə edib. Respondentlərə 18 dövlət qurumu yanında fəaliyyət göstərən İctimai Şuraya səs vermək imkanı yaradılıb. İştirak tamamilə onlayn şəkildə həyata keçirilib və hər bir vətəndaş üçün açıq olub.
Sorğunun nəticələrinə görə, Əmək və Əhalinin Sosial Müdafiəsi Nazirliyi yanında İctimai Şura 70 faiz səslə birinci, Qaçqınların və Məcburi Köçkünlərin İşləri üzrə Dövlət Komitəsi yanında İctimai Şura 17 faiz səslə ikinci, Fövqəladə Hallar Nazirliyi yanında İctimai Şura 4,5 faiz səslə üçüncü olub. Digər İctimai Şuralara ümumilikdə 8,5 faiz səs verilib.
Qeyd edək ki, sorğunun əsas məqsədi İctimai Şuraların fəaliyyətinin qiymətləndirilməsi, şəffaflığın və hesabatlılığın artırılması, həmçinin dövlət-vətəndaş dialoqunun gücləndirilməsidir.
