Statistika qorxudur: Dəm qazından ölüm halları çoxalır

ATV kanalında yayımlanan “XƏBƏRİN OLSUN” verilişində bu dəfə cəmiyyəti narahat edən ən ağrılı mövzulardan biri müzakirə olunub.

Xpress.az xəbər verir ki, aparıcı Turan Ədalətqızı dəm qazından zəhərlənmə və ölüm hallarının artması ilə bağlı ciddi faktları efirə daşıyıb.

Son günlər ölkənin müxtəlif bölgələrində qeydə alınan hadisələr göstərir ki, xüsusilə qış mövsümündə qaz sobalarından və su qızdırıcılarından düzgün istifadə olunmaması faciələrə səbəb olur. Rəsmi qurumların məlumatına görə, havalandırma sisteminin olmaması, köhnə və nasaz cihazlar, eləcə də bacaların vaxtında təmizlənməməsi əsas risk faktorlarıdır.

Verilişdə bildirilib ki, dəm qazı rəngsiz və qoxusuz olduğuna görə insanlar təhlükəni gec hiss edir. Mütəxəssislər mənzillərdə mütləq qaz detektorlarının quraşdırılmasını, texniki baxışların mütəmadi aparılmasını və gecə saatlarında işlək vəziyyətdə qaz cihazlarının nəzarətsiz buraxılmamasını tövsiyə edir.

Aparıcı Turan Ədalətqızı vurğulayıb ki, məsələ təkcə fərdi məsuliyyət deyil, həm də maarifləndirmə və nəzarət mexanizmlərinin gücləndirilməsidir. “XƏBƏRİN OLSUN” komandası mövzu ilə bağlı real ailə hekayələrini, ekspert rəylərini və məsul qurumların açıqlamalarını tamaşaçılara təqdim edib.

Sözügedən verilişi təqdim edirik.