Fırıldaqçılara qarşı kobud olmaq niyə təhlükəlidir? Mütəxəssislər xəbərdarlıq edir
Telefon fırıldaqçıları ilə danışarkən kobud davranmaq və ya onları ələ salmaq bir çoxlarına cazibədar görünə bilər. Lakin mütəxəssislər xəbərdarlıq edirlər ki, bu cür davranış gözlənilməz və xoşagəlməz nəticələrə səbəb ola bilər.
Xpress.az RIA Novosti-yə istinadən xəbər verir ki, qəzəbləndirilmiş dələduzlar qisas məqsədilə nömrənizi müxtəlif onlayn platformalarda qeydiyyatdan keçirə, nəticədə telefonunuz təsdiq kodları, reklam zəngləri və spam mesajlarla “bombardman” oluna bilər. Bu isə gündəlik həyatı ciddi şəkildə çətinləşdirə bilər.
Bir çox insan qarşı tərəfin fırıldaqçı olduğunu anlayan kimi istehzalı ifadələr işlətməyə, kobud cavab verməyə və ya onları “troll” etməyə çalışır. Ekspertlər isə bunun düzgün yanaşma olmadığını bildirirlər.
Onların sözlərinə görə, telefonun o biri ucunda tez-tez təcrübəli manipulyatorlar olur. Onları təhrik etmək və ya ifşa etməyə çalışmaq əvəzinə, ən təhlükəsiz yol danışığı dərhal dayandırmaq və zəngi sonlandırmaqdır.
Mütəxəssislər vurğulayırlar ki, əsas məqsəd emosiyalara qapılmadan şəxsi məlumatların təhlükəsizliyini qorumaq və mümkün risklərdən yayınmaqdır.
