Qərbi Azərbaycan İcmasında KONFLİKT: “Ziyalılar Şurasını şəxsi mənafelərin qurbanına çeviriblər” - FOTO
“Qərbi Azərbaycan İcmasının (QAİ) nəzdində "Ziyalılar Şurası" fəaliyyət göstərir. Məni də həmin Şuraya üzv yazıblar. Bu Şuranı şəxsi mənafelərin qurbanına çeviriblər. Artıq 5-ci iclasdır ki, şəxsən məni Şuranının tədbirlərinə dəvət etmirlər”.
Xpress.az xəbər verir ki, bu barədə sabiq millət vəkili, təhsil eksperti Etibar Əliyev sosial media hesabında yazıb.
O qeyd edib ki, Ziyalılar Şurasının əsas missiyası maarifçiliklə məşğul olmaqdır. Lakin təssüflər olsun ki, sözügedən qurum bu işi yetərincə bacarmır: “Başa düşmürəm, bəlkə başda QAİ rəhbəri Əziz Ələkbərli və Şuranın sədri, “Dialektik materializm” müəllimi Elxan Hüseynovun "mütərəqqi" ideyaları əsasında ziyalılığın kriteriyalarını dəyişiblər? Mən fəlsəfə üzrə fəlsəfə doktoruyam, 8 kitab müəllifiyəm, 500-dən çox elmi-publisistik məqaləm çap olunub. Sosial şəbəkələrdə ciddi maarifçiliklə və QAİ-nin ciddi ideoloji təbliğatı ilə məşğulam. İcmanın üzvü kimi mən xaricdə yaşayan və Azərbaycanın əleyhinə şərəfsizcəsinə təbliğat aparan termitlərə layiqli cavablar verən yeganə şəxsəm. Ziyalılar Şurası maarifçiliklə məşğul olmalıdır. Təssüflər olsun ki, bu işi yetərincə bacarmırlar”.
E.Əliyev QAİ-nin İdarə Heyətinin sədri, deputat Əziz Ələkbərlidən tələb edib ki, onun adını Ziyalılar Şurasından çıxarsınlar: “Bütün bunların fonunda məni ziyalı hesab etmirsiniz? Qərbi Azərbaycan İcması Prezident İlham Əliyevin ideyasıdır və bu qurumda konfliktlər birmənalı olaraq yolverilməzdir. Mən “Facebook” hesabımdan Əziz Ələkbərlidən tələb edirəm: Adımı Ziyalılar Şurasından çıxarın! İcmanın sıravi üzvü olmaq mənim üçün qürurvericidir. Qayıdış baş tutarsa öndə gedənlərdən biri mən olacam”.
Zərbəçi
