Ustad Aşıq Ələsgərin ədəbi irsi TƏBLİĞ OLUNUR - FOTO
“Dədə Ələsgər Ocağı” İctimai Birliyi və Azərbaycan Texniki Universitetinin birgə təşkilatçılığı ilə böyük ustad Aşıq Ələsgərin vəfatının 100-cü ildönümünə həsr olunmuş tədbir keçirilib.
Xpress.az xəbər verir ki, Azərbaycan Texniki Universitetində baş tutan tədbirdə elm, təhsil və mədəniyyət nümayəndələri, aşıq sənətinin tanınmış simaları, tələbələr və ziyalılar iştirak ediblər. Tədbirin əsas məqsədi Aşıq Ələsgərin zəngin ədəbi irsinin təbliği, onun sənət məktəbinin gələcək nəsillərə çatdırılması və milli-mənəvi dəyərlərimizin qorunması olub.
Tədbiri filologiya üzrə fəlsəfə doktoru Aytən Qurbanova aparıb.
Rəsmi hissədə çıxış edən Azərbaycan Texniki Universitetinin prorektoru Rəşad Əliyev Aşıq Ələsgər yaradıcılığının Azərbaycan ədəbiyyatı və milli düşüncə tarixində xüsusi yer tutduğunu vurğulayıb, bu irsin gənc nəslə çatdırılmasının vacibliyini qeyd edib.
Daha sonra "Dədə Ələsgər Ocağı" İctimai Birliyinin sədri Xətai Ələsgərli çıxış edərək Aşıq Ələsgər irsinin yaşadılması istiqamətində görülən işlərdən, həyata keçirilən layihələrdən və gələcək təşəbbüslərdən danışıb.
Tədbirdə filologiya üzrə fəlsəfə doktoru, dosent İlhamə Qəsəbova, tibb və filologiya üzrə fəlsəfə doktoru Nağdəli Zamanov, həmçinin Dədə Ələsgər irsinin tədqiqi və təbliği mərkəzinin direktoru Abbas Bağırov məruzələrlə çıxış edərək ustad sənətkarın poeziyası, fəlsəfi düşüncəsi və aşıq sənətinə verdiyi töhfələr haqqında geniş məlumat veriblər.
Tədbirin bədii hissəsi iştirakçılar tərəfindən maraqla qarşılanıb. Azərbaycan Respublikasının əməkdar artisti Rəhilə Bəndəliyeva, beynəlxalq müsabiqələr laureatı, Xəzər Universitetinin müəllimi Aşıq Ramin Qarayev, xanəndə Mehranə Vəliqızı, Dədə Ələsgər adına Ozan məktəbinin müəllimi Aşıq İlqar Qələmçəli, Aşıq İlham Əsgəroğlu və gənc aşıq Azad Laçınlı çıxış edərək Aşıq Ələsgərin söz dünyasını saz və musiqi nümunələri ilə təqdim ediblər.
Tədbirin sonunda Aşıq Ələsgərin Bakı şəhərində ucaldılmış heykəlinin maketi Azərbaycan Texniki Universitetinə təqdim edilib. Aşıq Ələsgər irsinin yaşadılması və təbliği istiqamətində belə görüşlərin davamlı keçirilməsinin vacibliyi vurğulanıb və iştirakçılara təşəkkür ifadə olunub.
Günay ATİLLA
