Ərzaq UCUZLAŞACAQ? - İqtisadçı deputatdan AÇIQLAMA
“Kənd təsərrüfatının inkişafı və bu sahədə yeni tədbirlərin həyata keçirilməsi prioritet istiqamətlərdən biridir.”
Bu sözləri Milli Məclisin İqtisadi siyasət, sənaye və sahibkarlıq komitəsinin üzvü Vüqar Bayramov Xpress.az-a açıqlamasında bildirib.
Onun sözlərinə görə, Prezident İlham Əliyevin sədrliyi ilə kənd təsərrüfatına həsr olunan müşavirənin keçirilməsi aqrar sektorun dövlətin diqqət mərkəzində olduğunu göstərir. Deputat qeyd edib ki, kənd təsərrüfatı həm ərzaq təminatı, həm də ərzaq təhlükəsizliyi baxımından Azərbaycan üçün strateji əhəmiyyət daşıyır və qlobal çağırışlar fonunda bu sahədə daha sistemli addımlara ehtiyac var.
V.Bayramov vurğulayıb ki, dövlət başçısının tapşırıqlarına uyğun olaraq yeni dövlət proqramı qəbul edilib. Proqramın əsas məqsədləri yerli istehsalın artırılması, qiymətlərin optimallaşdırılması, ixrac potensialının genişləndirilməsi və 2030-cu ilədək kənd təsərrüfatı məhsulları ixracının 6 milyard dollara çatdırılmasıdır.
Deputatın sözlərinə görə, prioritet istiqamətlər sırasında süni suvarma sistemlərinin tətbiqi, subsidiya mexanizmlərinin təkmilləşdirilməsi və yerli məhsul istehsalının artırılması yer alır. O bildirib ki, strateji məhsullar üzrə idxaldan asılılığın azaldılması ərzaq təhlükəsizliyinin gücləndirilməsi baxımından vacibdir.
V.Bayramov hesab edir ki, proqram fermerlərin daha yaxından dəstəklənməsinə, yerli istehsalın genişlənməsinə və nəticədə kənd təsərrüfatı məhsullarının qiymətlərində sabitliyin təmin olunmasına imkan yaradacaq. Bununla yanaşı, proqramın əsas hədəflərindən biri də kənd təsərrüfatı məhsullarının idxalından asılılığın minimuma endirilməsidir.
Afaq QURBANZADƏ
