Akademikin oğluna YÜKSƏK VƏZİFƏ VERİLDİ - FOTO

Tibbi Ərazi Bölmələrini İdarəetmə Birliyində (TƏBİB) kadr dəyişikliyi olub.

Xpress.az "Unikal"a istinadla xəbər verir ki, bununla bağlı TƏBİB-in İcraçı direktoru Anar Bayramov müvafiq əmr imzalayıb.

Əmrə əsasən, TƏBİB-in Beynəlxalq əlaqələr departamentinin yerində Beynəlxalq əlaqələr şöbəsi yaradılıb. Atilla-Turan Bayramov həmin şöbənin müdiri təyin edilib.

Müraciətlərlə iş departamenti isə İnzibati idarəetmə departamenti ilə birləşdirilib. İlham Həqiqət oğlu Hüseynov Müraciətlərlə iş departamentinin rəhbəri vəzifəsindən çıxarılıb. İnzibati idarəetmə və müraciətlərlə iş departamenti rəhbəri isə Elvin Fikrət oğlu Bayramovdur.

Eyni zamanda, Təlim və tədqiqatlar departamentinin rəhbəri Teymur Adışirin oğlu Mirzəbəyli vəzifəsindən azad edilib. Onun yerinə Elza Rafiq qızı Əfəndiyeva adıçəkilən departamentin rəhbəri təyin olunub.

Xpress.az xatırladır ki, Atilla-Turan Bayramov cərrah-transplantoloq, hepatoloq, tibb elmləri doktoru, professor, AMEA-nın müxbir üzvü Nuru Bayramovun oğludur.