Misir Mərdanov: “Test suallarının böyük əksəriyyəti dolaşdırıcıdır” - MÜSAHİBƏ + VİDEO

“Dünyada qəbul olunmuş təcrübəyə görə, ali məktəbə daxil olmaq, tələbə adını qazanmaq üçün insanlar xarici dil və riyaziyyatdan imtahan verirlər. Bu şərt istənilən ixtisas üzrə universitetə qəbul olmaq üçün keçərlidir. Lakin Azərbaycanda abituriyent altı-yeddi fəndən imtahan vermək məcburiyyətindədir. Fikrimcə, bu, məktəbli üçün, məzun üçün əlavə yükdür”.

Xpress.az xəbər verir ki, sabiq təhsil naziri Misir Mərdanov "Pozan Media"da yayımlanan “Yazılan və yozulan” verilişinin növbəti buraxılışında Seymur Elsevərə müsahibəsində bildirib.

Sabiq nazir deyib ki, hər bir insanın beyninin götürə biləcəyi bəlli bir yük var.

Onun qənaətincə, bu yükdən artığını ona yükləyəndə insanda pis proseslər, yəni psixoloji narahatlıqlar yaşana bilər: “Ona görə də hər bir insanların beyninin yük götürmə qabiliyyəti nəzərə alınmalıdır. Mən həm müəllimlərin sertifikasiya, işə qəbul (MİQ) imtahanlarına baxıram, həm də tələbə qəbulu üzrə test tapşırıqlarına baxıram, demək olar ki, sualların böyük əksəriyyəti dolaşdırıcıdır. O sualı hazırlayan adamın məqsədi budur ki, imtahan verən şəxs bu sualın cavabını bilməsin. Bu sualları cavablandırmaq üçün xüsusi fənd işlətməlisən. Hesab edirəm ki, bu məsələnin köklü həll olunma vaxtı artıq çoxdan çatıb”.

Ərturan İSMAYIL