Sabiq nazir: “İnsanları əlavə xərc çəkməyə, gərginlik yaşamağa məcbur edirlər” - MÜSAHİBƏ + VİDEO
“Elə bir vəziyyət yaranıb ki, imtahan suallarını cavablandırmaq üçün şagird dərsdən əlavə mütləq şəkildə xüsusi repetitor yanına hazırlığa getməlidir. Bununla məşğul olan ayrı bir qrupdur. Bundan başqa, imtahan verib müəyyən bal toplayan şəxs özü sərbəst şəkildə ixtisas seçimi edə bilmir. O, mütləq şəkildə başqa bir şəxsə və ya təhsil xidmətləri göstərən şirkətə müraciət etməli, müəyyən ödəniş müqabilində kodlaşdırma etməli, ixtisas seçməlidir. Bir adamdan 100-200 manat pul alırlar buna görə. Bu işlə məşğul olan da bir ayrı qrupdur. Baxın görün nə qədər mürəkkəbləşdiriblər prosesi. Halbuki bunu çox sadə etmək olar”.
Xpress.az xəbər verir ki, sabiq təhsil naziri Misir Mərdanov "Pozan Media"da yayımlanan “Yazılan və yozulan” verilişinin növbəti buraxılışında Seymur Elsevərə müsahibəsində bildirib.
Sabiq nazirin sözlərinə görə, elə mexanizm qurulmalıdır ki, şagird, abituriyent bunu asanlıqla edə bilsin, kimsəyə möhtac olmasın: “Təəssüf ki, əksinə olaraq, imtahan prosesini mürəkkəbləşdirib insanları əlavə xərc çəkməyə, gərginlik yaşamağa məcbur edirlər. Yaxud dövlət qulluğu imtahanını götürək. Bu imtahandan keçib sertifikat əldə edən insanı təkrar müsahibəyə, sorğu-suala cəlb etməyi düzgün saymıram. Mən nazir olduğum vaxt rəhbərlik etdiyim qurumda buna yol verməmişəm. Lakin indi insanlar dövlət qulluğuna qəbul olmaq üçün imtahan verirlər, sertifikat əldə edirlər, lakin 2-3 il gözləsələr də müvafiq qaydada iş tapa bilmir, dövlət qulluğuna qəbul ola bilmirlər. Onlara bildirilir ki, yer yoxdur. Fikrimcə, belə məsələlərdə humanist yanaşma tətbiq edilməlidir. Sanki insanları məqsədli şəkildə məcbur edirlər ki, narazı olsun, şikayətçi olsun və sair”.
Ərturan İSMAYIL
