Sabiq nazir: “Ali məktəblərə qəbul asan olmalıdır” - MÜSAHİBƏ + VİDEO
“Hazırda ali məktəblərə qəbul çox çətindir, amma məzun olmaq asandır. Əslində isə qəbul asanlaşdırılmalıdır, mütəxəssis hazırlığı prosesi çətinləşməlidir. Yəni, ali təhsil müəssisəsini bitirən şəxs öz sahəsi üzrə əsl peşəkar kadr olmalıdır”.
Xpress.az xəbər verir ki, sabiq təhsil naziri Misir Mərdanov "Pozan Media"da yayımlanan “Yazılan və yozulan” verilişinin növbəti buraxılışında Seymur Elsevərə müsahibəsində bildirib.
Sabiq nazirin qənaətincə, universitetin tələbə-məzuna verdiyi diplom elə səviyyədə olmalıdır ki, gələcəkdə harasa iş üçün müraciət edəndə həmin şəxsdən təkrar imtahan götürməsinlər: “Misal üçün, hazırda müəllimlərin işə qəbul (MİQ) imtahanları keçirilir. Əgər Dövlət İmtahan Komissiyası universiteti bitirən bir şəxsə müəllim ixtisası diplomu veribsə, onu təkrar MİQ imtahanına cəlb etmək nəyə lazımdır? Yaxşı olar ki, elə o MİQ imtahanı tələbə-məzuna diplom verilməzdən öncə ali təhsil müəssisəsində həyata keçirilsin”.
M.Mərdanov deyib ki, MİQ imtahanında verilən suallardan tələbənin heç bir məlumatı yoxdur: “Universiteti bitirmiş şəxsə həmin suallar yaddır. MİQ-də verilən suallarla bağlı elə universitetin özündə dərs keçilməlidir, tədris proqramında dəyişiklik edilməlidir. MİQ-dən dərs keçməyən bir tələbə bundan necə imtahan verməlidir? Halbuki, tələbə yekun imtahan verib diplom almaqla bütün proses yekunlaşmalıdır, əlavə MİQ imtahanına ehtiyac qalmamalıdır. Belə olmadığı üçün universiteti yüksək səviyyədə bitirmiş peşəkar kadrlar özəl təhsil müəssisələrində dərs keçməyə, işləməyə, yaxud da başqa sahələrdə çalışmağa üstünlük verirlər.
Sabiq nazir vurğulayıb ki, insanın qabiliyyətini müəyyənləşdirmək üçün 30 dəqiqə, yaxud 1 saat onunla söhbət etmək kifayət deyil: “Bizim qanunlarımızda, təhsilin satandartında qeyd olunur ki, təhsilimizin əsas vəzifəsi şəxsiyyət yetişdirməkdir. Bizim təhsilimiz şəxsiyyətyönümlü təhsil olmalıdır. Ancaq biz davamlı olaraq şagirdləri, tələbə-məzunları imtahanlara cəlb edirik. Bir insan ömrü boyu nə qədər imtahan verməlidir?”
Ərturan İSMAYIL
