Ağıllı telefonun ömrünü bu üsulla 8 İLƏ QƏDƏR UZADIN
Ağıllı telefonların qiymətinin sürətlə artdığı bir dövrdə mütəxəssislər bildirirlər ki, düzgün istifadə qaydalarına əməl etməklə cihazların ömrünü illərlə uzatmaq mümkündür. Şüurlu qulluq və qoruma vərdişləri sayəsində telefonların performansı uzun müddət qorunur, yeni cihaz almağa ehtiyac azalır.
Müasir dövrdə həm iqtisadi vəziyyət, həm də ekoloji şüur baxımından telefonun istifadə müddətini artırmaq olduqca vacibdir. Texnologiya mütəxəssislərinin fikrincə, düzgün istifadə vərdişləri və mütəmadi texniki qulluqla bir cihazın ömrünü 7–8 ilə qədər uzatmaq mümkündür.
Yüksək qiymətə satılan telefonların bir neçə ildən sonra zəifləməsi və performans itirməsi bir çox istifadəçini yeni cihaz almağa məcbur edir. Halbuki sadə tədbirlərlə bu prosesi xeyli uzatmaq mümkündür. Mütəxəssislər vurğulayırlar ki, telefonun alınmasından gündəlik istifadəsinə qədər hər addımda şüurlu davranmaq lazımdır.
1. Fiziki qoruma ən vacib amildir
Cihazın zədələnməsi onun ömrünü ən tez azaldan səbəblərdən biridir. Düşmə və zərbə nəticəsində yaranan xəsarətlər yalnız ekranı deyil, daxili hissələri də zədələyə bilər. Buna görə də zərbəyə davamlı keyfiyyətli örtük və ekran qoruyucu film istifadə etmək tövsiyə olunur.
2. Batareya idarəçiliyinə diqqət
Ağıllı telefonlarda ən tez köhnələn hissə batareyadır. Yanlış şarj vərdişləri batareyanın tutumunu qısa müddətdə azaldır. Mütəxəssislər şarj səviyyəsini mümkün qədər 20–80% aralığında saxlamağı məsləhət görürlər. Tam boşalma və ya daim 100% dolu qalma batareyanın kimyəvi strukturunu zədələyir.
3. İstilikdən qorumaq
Telefonun yüksək temperaturda qalması da ömrünü azaldır. Günəş işığı, isti səthlər və qalın örtüklər cihazın isinməsinə səbəb olur ki, bu da batareya performansına mənfi təsir göstərir.
4. Proqram təminatını yeniləmək
İstehsalçı tərəfindən təqdim edilən yeniləmələri vaxtında quraşdırmaq həm təhlükəsizlik, həm də sistemin sabitliyi üçün vacibdir. Həmçinin, yaddaşın tam dolmaması, lazımsız tətbiqlərin silinməsi və arxa planda işləyən proseslərin azaldılması cihazın ümumi performansını artırır.
5. Mütəmadi sistem təmizliyi
Mütəxəssislər bildirirlər ki, ildə bir neçə dəfə məlumatları ehtiyat nüsxəyə alıb cihazı fabrika parametrlərinə qaytarmaq sistemi “təzələyir” və onun ömrünü uzadır.
6. İstifadə vərdişlərinə nəzarət
Telefonun təkcə texniki deyil, “sosial ömrü” də var. Həddindən artıq istifadə, uzunmüddətli oyun və ya tətbiq seansları cihazın tez aşınmasına və nasazlıqların yaranmasına səbəb ola bilər. Buna görə gündəlik istifadədə daha şüurlu davranmaq vacibdir.
Xpress.az
