Bu il “Qocalar evi”nə neçə ahıl YERLƏŞDİRİLİB? – RƏSMİ AÇIQLAMA
Bu ilin ötən dövründə Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin Ahıl şəxslər üçün sosial xidmət müəssisəsinə ümumilikdə 60 nəfər yerləşdirilib.
Bildirilib ki, Agentliyin Ahıl şəxslər üçün sosial xidmət müəssisəsində hazırda 231 ahıl dövlət himayəsində yaşayır. Onlardan 119-u kişi, 112-si qadındır.
Qeyd edilib ki, müəssisə müasir tələblərə cavab verən şəraitlə təmin olunub:
"“Burada hər bir sakin üçün rahat yaşayış mühiti yaradılıb və otaqlar müasir məişət avadanlıqları, o cümlədən soyuducu, televizor və digər vacib texniki vasitələrlə təchiz edilib. Sakinlərin yaşayışı, keyfiyyətli sosial xidmətlərlə əhatə olunmaları, asudə vaxtlarını mənalı keçirmələri üçün şərait yaradılıb. Müəssisədə kitabxana və idman zalları, müəyyən əl işləri hazırlamaq üçün emalatxanalar və s. ahılların istifadəsindədir. Müəssisədə yaşayanların sağlamlığına da xüsusi diqqət göstərilir, vaxtaşırı tibbi müayinədən keçirilirlər. Ahıllar təhlükəsiz sosial xidmətdən yararlanmaq üçün mühafizəçilər tərəfindən 7/24 mühafizə olunurlar."
Müəssisədə təqdim olunan sosial xidmətlər təkcə gündəlik qayğı ilə məhdudlaşmır. Stasionar formada göstərilən sosial xidmətlərlə yanaşı, ahıllarla sosial iş aparılır, onların cəmiyyətdən təcrid olunmalarına gətirib çıxaran halların qarşısının alınması, sosial adaptasiyası və sosial-psixoloji reabilitasiyası həyata keçirilir. Ahıllarımız hərtərəfli dövlət qayğısı ilə əhatə olunurlar”.
Ahıl şəxslərin sosial inteqrasiyası üçün də işlərin aparıldığı vurğulanıb.
“Sakinlərin asudə vaxtlarının səmərəli təşkili üçün tədbirlər görülür, ahıllarımız idman yarışları, gimnastika məşğələləri, mədəni tədbirlər, ekskursiyalar, bayram proqramları və yaradıcılıq fəaliyyətlərinə cəlb olunurlar. Bu həm onların sağlamlığının qorunmasına, həm də cəmiyyətlə ünsiyyət imkanlarının genişlənməsinə xidmət edir” – deyə məlumatda qeyd edilib.
