Gürcüstanın sabiq baş naziri evində 6,5 milyon dollar saxladığı ittihamı ilə məhkəmə qarşısında
Gürcüstanın keçmiş baş naziri İrakli Qaribaşviliyə qarşı irəli sürülən iri məbləğdə çirkli pulların yuyulması ittihamı ölkədə siyasi zəlzələ effekti yaradıb.
Xpress.az xəbər verir ki, Tbilisidə keçirilən məhkəmə iclasında prokurorluq Qaribaşvilinin evində aparılan axtarış zamanı 6,5 milyon dollar nağd pul tapıldığını açıqlayıb. 43 yaşlı siyasətçi ittihamları qəbul edib və 1 milyon lari (təxminən 368 min dollar) girov müqabilində azadlığa buraxılıb.
İrakli Qaribaşvili iki dəfə — 2013–2015 və 2021–2024-cü illərdə baş nazir vəzifəsində çalışıb. O, uzun illər ölkənin qeyri-rəsmi lideri sayılan milyarder Bidzina İvanişvilinin ən yaxın müttəfiqlərindən biri kimi tanınırdı.
Prokurorluğun məlumatına görə, Qaribaşvili müdafiə naziri və baş nazir olduğu illərdə “gizli biznes fəaliyyəti” ilə məşğul olub, qeyri-qanuni gəlir əldə edib və bu pulları ailə üzvlərinin adından “hədiyyə” kimi bəyan edərək pul yuyulmasıəməliyyatları həyata keçirib.
Onun vəkili Amiran Qiquaşvili BBC-yə açıqlamasında bildirib ki, müvəkkili istintaqla əməkdaşlıq edir:
“Məhkəmə nəzərə aldı ki, cənab İrakli ittihamları qəbul edir, istintaqdan gizlənmir və tam əməkdaşlıq göstərir.”
Bu iş Gürcüstan hakim elitasına qarşı açılan ilk yüksək səviyyəli korrupsiya prosesi kimi dəyərləndirilir. Analitiklər hesab edirlər ki, Qaribaşvilinin süqutu İvanişvilinin öz komandasında artan etimadsızlığını göstərir.
Siyasi ekspert Ghia Nodia deyib ki, “İvanişvili artıq Qaribaşviliyə və digər yaxın adamlarına inanmır, yalnız hazırkı baş nazir Kobaxidzeni etibarlı hesab edir.”
Son aylarda Gürcüstanda vəziyyət gərgindir — hökumət 2024-cü ilin noyabrında Avropa İttifaqı ilə üzvlük danışıqlarını dayandırdığını açıqladıqdan sonra Tbilisidə etiraz aksiyaları davam edir. Müxalifət liderlərinin çoxu həbs olunub, yeni qanunlar isə vətəndaş cəmiyyəti və müstəqil mediaya qarşı yönəlib.
Müşahidəçilər bildirirlər ki, Qaribaşvilinin məhkəməsi təkcə korrupsiya qalmaqalı deyil, həm də Gürcüstanın Qərbdən uzaqlaşan siyasi kursunun fonunda hakim elitanın daxilində baş verən güc mübarizəsinin göstəricisidir.
