“Halal” sertifikatı ətin keyfiyyətini müəyyən etmir -Cavanşir Paşazadə
Ətin keyfiyyəti ilə əlaqədar Azərbaycan Qida Təhlükəsizliyi Agentliyi (AQTA) tərəfindən reydlər keçirilib. Son günlər ət və ət məhsullarının təhlükəsizliyi, eləcə də “Halal” sertifikatı ilə bağlı müzakirələr artıb. Bəs “Halal” sertifikatı ətin keyfiyyətini müəyyən edirmi? Məsələ ilə bağlı Milli Məclisin deputatı Cavanşir Paşazadə Xpress.az-a açıqlama verib.
Deputatın sözlərinə görə, Prezident İlham Əliyevin dalaq xəstəliyi ilə bağlı imzaladığı sərəncamdan sonra aidiyyəti qurumlar tərəfindən profilaktik tədbirlər gücləndirilib:
“İstər AQTA, istərsə də digər müvafiq qurumlar Prezidentin sərəncamından sonra bir sıra tədbirlər həyata keçirməyə başlayıblar. Artıq dalaq xəstəliyinin yayılmasında azalma müşahidə olunur,” – deyə Cavanşir Paşazadə bildirib.
Deputat qeyd edib ki, ətin keyfiyyətini və təhlükəsizliyini müəyyən edən sertifikat AQTA tərəfindən verilməlidir.
“Halal" sertifikatı isə dini qaydalar əsasında kəsilən heyvanların ətinə aid olmalıdır. Əgər kimsə dünən donuz əti satıb, bu gün isə mal əti satırsa, onun məhsulunu "halal" adlandırmaq düzgün deyil. Dini qurumların komissiyasından keçməyən şəxslərin "halal"adı ilə ət məhsulu satması yolverilməzdir,” – deputat vurğulayıb.
Onun sözlərinə görə, “Halal” sertifikatı almaq istəyən şəxslər mütləq dini qurumlara müraciət etməli, orada xüsusi komissiya yaradılmalı və yalnız bu komissiyanın qərarından sonra sertifikat verilməlidir.
“Təəssüf ki, bəzi şəxslər insanların inancı və hissləri ilə oynayaraq, heç bir yoxlama aparmadan və Qafqaz Müsəlmanları İdarəsinə müraciət etmədən məhsullarının üzərinə ‘halal’ yazırlar. Bunun qarşısı alınmalıdır ki, insanlar aldanmasınlar,” – deyə deputat əlavə edib.
Deputat onu da qeyd edib ki, dini qurumlar cəza tətbiq etmir.– onlar sadəcə fikir bildirə və tövsiyə verə bilərlər.
AFAQ
