Könüllü qan donurluğu hər il artır -Açıqlama
Son zamanlar qan donurluğu üçün müraciət edənlərin sayı ötən illərə nisbətən artıb. Buna baxmayaraq hələdə müəyyən qan qruplarının donurlarına ehtiyac duyulur.
Məsələ ilə bağlı Səhiyyə Nazirliyi Respublika Qan Bankı Xpress.az a verdiyi açıqlamada bildirib ki, son illərdə artan tibbi xidmətlər fonunda qan və onun komponentlərinə tələbat da yüksəlib. Buna müvafiq olaraq aparılan təbliğat-təşviqat tədbirləri nəticəsində ölkəmizdə qan donorluğuna maraq da artmaqdadır. Bu ilin ilk 9 ayı ərzində Səhiyyə Nazirliyi Respublika Qan Bankında və onun regional bölmələrində 100 minə yaxın şəxs könüllü şəkildə qan verərək donor olub. Bu da əvvəlki illərin göstəricilərindən yüksəkdir. Qan donorluğu yalnız tibbi ehtiyac deyil, həm də sosial məsuliyyət nümunəsi kimi dəyərləndirilir. Qan donorluğu könüllülük prinsipi əsasında həyata keçirilir.Azərbaycan populyasiyasında ən az rast gəlinən AB RH(-) (0,9%) və B RH(-) (2,1%) qan qruplarıdır. Ümumilikdə mənfi rezuslu qan qrupları ümumi qan qruplarının 11,1 faizini təşkil edir. Bu qruplardan olan donorların dəstəyinə xüsusi ehtiyac duyulur.
Səhiyyə Nazirliyi Respublika Qan Bankı tərəfindən qan ehtiyatlarının qorunması və artırılması məqsədilə mütəmadi qanvermə aksiyaları keçirilir, könüllü donorların iştirakı ilə ehtiyatlar daim yenilənir. Əsas məqsədimiz ölkə üzrə bütün qan qruplarından olan resipiyentlərin qan və onun komponentləri ilə vaxtında və etibarlı şəkildə təmin edilməsidir.
