Telefonunuzda həftədə ən az bir dəfə bunu etməlisiniz

ABŞ Milli Təhlükəsizlik Agentliyinin (NSA) tövsiyəsinə istinad edən ZDNet xəbər verir ki, telefonu həftədə ən az bir dəfə söndürmək, xüsusilə kiber hücumlara və casus proqramlara qarşı təsirli bir qorunma üsuludur.

Mütəxəssislərin fikrincə, ağıllı telefonlar kompüterlər kimi arxa planda davamlı olaraq bir çox gizli prosesləri icra edir. Zaman keçdikcə bu proseslər cihazı zəiflədir, səhv ehtimalını artırır və təhlükəsizlik boşluqları yaradır.

Cihazı yenidən başlatmaq və ya tamamilə söndürmək bu prosesləri yeniləyir:
   •    RAM yaddaşını təmizləyir,
   •    Müvəqqəti faylları silir,
   •    Gizli şəkildə işləyən tətbiqləri dayandırır.

Beləliklə, sistem sanki “sıfırlanır” və bəzi kiber hücumların təsiri zərərsizləşdirilir.

“Bu üsul tam müdafiə təmin etmir, lakin hakerlərin sistemə sızmasını xeyli çətinləşdirir.”

NSA ekspertləri həftəlik yenidən başlatmadan əlavə, istifadəçilərə bu addımları da tövsiyə edir:
   •    Əməliyyat sistemini və tətbiqləri mütəmadi olaraq yeniləyin.
   •    Bluetooth və yer müəyyənetmə (location) funksiyalarını istifadə etmədikdə söndürün.
   •    İctimai Wi-Fi şəbəkələrinə qoşularkən diqqətli olun.
   •    Şifrə əvəzinə barmaq izi və ya üz tanıma kimi biometrik identifikasiya üsullarına üstünlük verin.