Ermənistan-Rusiya arasında taxıl savaşı: Qafqazda yeni güc balansı AÇIQLAMA

Deputat bildirib ki, Ermənistanla Rusiya arasında iqtisadi əməkdaşlıq, xüsusilə də taxıl məsələsində yaranan fikir ayrılığı iki ölkə arasında gərginliyin siyasi müstəvidən iqtisadi sahəyə keçdiyini göstərir:
“Məlumdur ki, bu gün Ermənistan öz taxılının təxminən 80 faizini Rusiyadan idxal edir. Lakin Qərbə inteqrasiya məqsədilə Ukraynadan taxıl almaq istəyir və bununla da Ukraynanı iqtisadi cəhətdən dəstəkləməyə çalışır. Bu isə təbii ki, Rusiyanın maraqlarına ziddir,” – deyə Arzu Nağıyev bildirib.

Deputatın sözlərinə görə, belə vəziyyətdə Cənubi Qafqazda yeni reallıqlar formalaşır:
“Əgər Rusiya Ermənistanla iqtisadi əlaqələri məhdudlaşdırarsa, bu, Ermənistanın ərzaq təhlükəsizliyi və enerji asılılığı üçün ciddi risklər yarada bilər. Qərb bazarlarına çıxış imkanlarının məhdudluğu da ölkəni çətin vəziyyətə salır. Moskva bu asılılıqdan təzyiq aləti kimi istifadə edir və 2026-cı il seçkiləri ərəfəsində bu təzyiqlərin daha da artacağı gözlənilir.”
Arzu Nağıyev hesab edir ki, yaranmış vəziyyət Azərbaycan üçün strateji üstünlüklər formalaşdırır:
“Regionda iqtisadi və logistika mərkəzi kimi Azərbaycanın rolu daha da güclənir. Artıq bir çox daşınmalar ölkəmizin ərazisindən keçir. Ermənistanın Rusiyadan uzaqlaşması fonunda Türkiyə ilə münasibətlərin yaxınlaşması da Azərbaycan-Türkiyə tandemini daha da möhkəmləndirir.”

Deputat vurğulayıb ki, iqtisadi asılılıq böhranı Ermənistanı daha realist siyasət yürütməyə və sülh sazişinə konstruktiv yanaşmağa məcbur edəcək:
“Rusiya-Ermənistan münasibətlərindəki gərginlik qısamüddətli risklər yaratsa da, uzunmüddətli dövrdə bu proses Azərbaycanın regional mövqelərinin möhkəmlənməsinə və sülhün bərqərar olmasına xidmət edə bilər.”

Afaq Qurbanzadə