İkinci ali təhsil almaq istəyənlərin NƏZƏRİNƏ – Bu şansdan yararlana bilərlər

Azərbaycanda hər kəsin təhsil almaq hüququ var. Qanunvericiliyə görə, ölkədə təhsil pulsuzdur və hər bir vətəndaş da bundan yararlana bilər.

Ali təhsilə yiyələnmək istəyənlər bir dəfə bu imkandan yararlanıb, dövlət hesabına təhsil alırlar.
 

Lakin ikinci dəfə ali təhsil həvəsinə düşənlər bunu öz hesablarına həyata keçirməlidirlər. Çünki dövlət bu şansı vətəndaşa bir dəfə verir.

Ölkədə son zamanlar ikinci ali təhsil alanların sayında isə artım var.

Bəs onlar təhsil tələbə kreditlərindən istifadə edə bilərlərmi?

Mövzu barədə Bizim.Media-ya danışan təshil sahəsi üzrə ekspert Elçin Əfəndi deyib ki, onlar bunun üçün müraciət edib, kredit hesabına təhsil haqlarını ödəyə bilərlər:

“İkinci ali təhsil alarkən, yəni şəxs əgər  ödənişli əsaslarla təhsil alırsa, təhsil-tələbə kredit fonduna müraciət edə bilər.
 

Düzdür, başlanğıc olaraq, ilk dəfə ali təhsil alanlara üstünlük verilir və onlara təhsil-tələbə kreditindən faydalanmağa imkan verilir. Onların yerləşdirilməsi başa çatdıqdan, onlara kreditlər ayrıldıqdan sonra ikinci ali təhsil alan şəxslərə də kreditin verilməsi prosesinə baxıla bilər.

Bunun üçün ikinci ali təhsil alan şəxs Təhsil Tələbə Kredit fonduna müraciət etməldir.

Həmin fond müəyyən araşdırmalar apardıqdan sonra sorğuya müsbət və ya mənfi cavab verir”.