Kondisioner plastiklərini məişət vasitələri ilə ağartmağın SADƏ ÜSULU

İsti havalarda ən böyük rahatlıq mənbələrindən biri olan kondisionerlər zamanla günəş işığı, toz və rütubətin təsiri ilə sarala bilər. Xüsusilə daxili blokun plastik səthlərində yaranan bu rəng dəyişimi cihaz təmiz işləsə belə ona köhnə və baxımsız görünüş verir. Lakin saralmış plastiki ağartmaq üçün xüsusi məhsullara ehtiyac yoxdur — bir neçə sadə məişət vasitəsi ilə plastik səthləri yenidən ağ və parlaq vəziyyətinə qaytarmaq mümkündür.

Plastik səthi ağartmağın əsas üsulları

Təmizləməyə başlamazdan əvvəl kondisioneri söndürmək və elektrik şəbəkəsindən ayırmaq vacibdir.

1. Çörək sodası pastası

Ən sadə və təsirli üsullardan biri çörək sodası ilə qalın təmizləyici pasta hazırlamaqdır. Bunun üçün:

Çörək sodasına bir neçə damcı su əlavə edərək qalın pasta yaradın;

Pastanı saralmış səthə çəkin və bir neçə dəqiqə gözləyin;

Daha sonra səthi nəm bir parça ilə silərək təmizləyin.

Bu üsul həm saralmanı yüngülləşdirir, həm də toz və kir qalıqlarını aradan qaldırır.

2. Sirkə ilə dərin təmizlik

Plastikdə daha dərin kir varsa, isti su ilə qarışdırılmış ağ sirkə istifadə etmək tövsiyə olunur. Sirkə:

Yağ və kir qatlarını əridir;

Səthə parlaqlıq gətirir;

Sprey şüşəsi ilə tətbiq edildikdə təmizləmə prosesi daha rahat olur.

Güclü saralma üçün hidrogen peroksid

Günəş və istiliyə uzunmüddətli məruz qalma nəticəsində plastikdə yaranan dərin saralma hallarında hidrogen peroksid təsirli nəticə verir. Bunun üçün:

Hidrogen peroksidi yumşaq bir parça ilə səthə sürtün;

Rəngin tədricən açıldığını müşahidə edin;

Tətbiqdən sonra səthin tam qurumasına diqqət edin — yaş qalan plastikdə ləkə və izlər qala bilər.

Saralma çox dərindirsə, tək tətbiq kifayət etməyə bilər. Bu halda prosesi bir neçə dəfə təkrarlamaq məsləhətdir.

Müntəzəm təmizlik saralmanın qarşısını alır

Kondisioner plastiklərini müntəzəm olaraq silmək və tozun yığılmasının qarşısını almaq saralmanı gecikdirir. Bundan əlavə:

Nəm parça ilə həftəlik təmizləmə;

Birbaşa günəş işığından qoruma;

Kondisioner filtrinin vaxtında dəyişdirilməsi plastik səthlərin daha uzun müddət yeni kimi qalmasına kömək edir.