Əgər yuyucu vasitədə bu işarələr yoxdursa, ondan istifadə etməyin- XƏBƏRDARLIQ
Məişət yuyucu vasitələrinin üzərindəki təhlükəsizlik simvolları bir çox insan tərəfindən nəzərdən qaçırılsa da, sağlamlığın qorunması üçün həyati əhəmiyyət daşıyır. Avropa Kimya Agentliyinin (ECHA) mütəxəssisləri bildirirlər ki, etiketlənməyən və ya məcburi təhlükə nişanları olmayan təmizlik məhsulları ciddi zəhərlənmə riski yaradır.
Gündəlik istifadə etdiyimiz yuyucu vasitələrdə səhv etiketləmə və ya etiketin tamamilə olmaması görünməz təhlükələrə səbəb olur. Kimyəvi təmas hallarının artması, istehlakçıların məhsul seçərkən daha diqqətli olmasını zəruri edir.
ECHA-nın İstehlakçı Təhlükəsizliyi Bölməsinin eksperti Dr. Anna Müller son qiymətləndirməsində belə xəbərdarlıq edib:
“Etiketində məcburi təhlükə simvolları olmayan heç bir təmizləyici məhsuldan istifadə etməyin. Belə məhsulların tərkibi, risk səviyyəsi və sağlamlığa təsirləri məlum deyil.”
Təmizləyici məhsulların üzərində yer alan təhlükə rəmzləri sağlamlığın və ətraf mühitin qorunması üçün vacib xəbərdarlıq funksiyası daşıyır. Avropa İttifaqı və Türkiyədə qüvvədə olan qaydalara əsasən, yuyucu vasitələrin qablaşdırmasında aşağıdakı simvollar mütləq görünməlidir:
- Aşındırıcı maddə nişanı (GHS05)
Dəridə və gözlərdə ciddi yanıqlara səbəb ola bilər. Xüsusilə güclü yağ sökücülər və soba təmizləyicilərində olur.
- Qıcıqlandırıcı / Allergen xəbərdarlığı (GHS07)
Dərinin qıcıqlanması, tənəffüs yollarında həssaslaşma və allergik reaksiyalar riski yarada bilər. Məişət yuyucu vasitələrində ən çox rast gəlinən xəbərdarlıqdır.
- Ekoloji təhlükə simvolu (GHS09)
Bu məhsullar su həyatı üçün zərərli ola bilər. Onların lavaboya və drenaja birbaşa tökülməsi təhlükəlidir.
- Alovlanan material nişanı (GHS02)
Aerozol və solvent əsaslı təmizləyicilərdə olur və yüksək alovlanma riski daşıyır.
Dr. Müller bu işarələri “gözardı edilməməli kritik məlumatlar” kimi qiymətləndirərək əlavə edib:
“Etiketsiz məhsullarda risk bilinmir və bu, istehlakçını tamamilə müdafiəsiz qoyur.”
Etiket üzrə təqdim edilməli digər məlumatlar
Təkcə təhlükə simvolları kifayət deyil. Yuyucu vasitələrin etiketində aşağıdakı məlumatlar da olmalıdır:
Məhsulun istifadə məqsədi
Doğru istifadə qaydaları
İstehsalçı və ya idxalçı haqqında məlumat
Tərkib siyahısı və allergen bildirişləri
UFI kodu – zəhərlənmə zamanı məhsulun formulasını dərhal müəyyənləşdirməyə kömək edir
Partiya / istehsal nömrəsi
ECHA-nın hesabatına görə, bu məlumatların olmaması məhsulun etibarsız və hətta qanunsuz istehsal olunduğuna işarə edə bilər.
Etiketsiz məhsullar niyə təhlükəlidir?
Ekspertlərə görə, etiket və marka olmayan təmizləyici vasitələr aşağıdakı riskləri yaradır:
Kimyəvi tərkibi və sıxlığı bilinmir
Dəri və göz yanıqları ehtimalı yüksəkdir
Tənəffüs yolu ilə qəbul edildikdə ağciyər zədələnməsi yarada bilər
Ev heyvanları üçün zəhərlənmə riski artır
Təcili tibbi yardım zamanı tərkib məlum olmadığı üçün düzgün müdaxilə çətinləşir
Hesabatda bildirilir ki, Avropada zəhərlənmə mərkəzlərinə edilən müraciətlərin müəyyən hissəsi məhz etiketsiz təmizləyici məhsullarla bağlıdır.
Təhlükəsiz deterjan seçməyin qızıl qaydaları
Dr. Müller və ECHA ekspertləri istehlakçılara aşağıdakı tövsiyələri verir:
Qablaşdırmada bütün təhlükə simvollarının olduğundan əmin olun
Yalnız orijinal və qapağı açılmamış məhsulları seçin
Açıq şəkildə, bidonla satılan məhsullardan uzaq durun
Ekoloji sertifikatlı məhsullara üstünlük verin
Allergen bildirişlərini diqqətlə oxuyun
Bu sadə addımlar həm sağlamlığın, həm də ətraf mühitin qorunmasına mühüm töhfə verir.
