Heç kimə, xüsusən də yaxınlarınıza deməməli olduğunuz 7 şey
Psixoloqlar xəbərdarlıq edir: ailə daxilində həddindən artıq açıqlıq münasibətlərin pozulmasına gətirib çıxara bilər. Məlum olur ki, sevdiklərimizlə hər şeyi bölüşmək düşündüyümüz qədər sağlam deyil. Moskva Psixologiya İnstitutunun araşdırmasına görə, respondentlərin 67%-i şəxsi məlumatları yaxınları ilə paylaşdıqları üçün sonradan peşman olduqlarını etiraf edib.
Aşağıda münasibətləri gərginləşdirən və heç kimə — xüsusən də yaxın qohumlara — danışmaq məsləhət olmayan 7 mövzu yer alır.
1. Maliyyə vəziyyəti
Maaş, bonuslar, gəlir artımı və ya böyük alışlar barədə danışmaq ailədə müqayisə və narazılıq yarada bilər. Yüksək gəlir qohumlarda paxıllığa, aşağı gəlir isə tənqidə və “xərcləmə dərslərinə” səbəb olur. Maliyyə mövzuları yaxınlar arasında belə, tez-tez gərginlik doğurur.
2. Gələcək planlar
Köçmək, karyera dəyişmək və ya biznesə başlamaq istəyirsinizsə, bu haqda erkən danışmaq düzgün deyil. Qohumlar, adətən, öz köhnəlmiş təcrübələrinə əsaslanaraq motivasiyanı azaldan məsləhətlər verirlər:
“Buna nə ehtiyac var?”, “Əgər alınmasa?”, “Təhlükəlidir!”.
Bu cür sözlər hələ başlamadan sizi planlarınızdan soyuda bilər.
3. Ailə münaqişələri
Həyat yoldaşınız və ya övladlarınızla yaşadığınız mübahisələri qohumlarla paylaşmaq münasibətlərə zərbə vurur. Sizin çoxdan unutduğunuz bir söz, qohumların yaddaşında illərlə qalır və yaxınlarınız haqqında mənfi fikir formalaşdırır. Nəticədə ailədaxili münasibətlərə kənar müdaxilələr artır.
4. Kiçik sağlamlıq problemləri
Ciddi xəstəliklər barədə yaxınları məlumatlandırmaq vacibdir, amma hər xırda narahatlığı bölüşmək lazım deyil. Bu, qohumlarda əsassız təşviş yaradır və “müalicə məsləhətləri” ilə müşayiət olunur.
Psixoterapevt Yelena Krasnikova bildirir ki, xəstələr qohumların artıq maraq və təzyiqindən çox yorulur, bu isə psixoloji vəziyyəti daha da ağırlaşdırır.
5. Uğurlar və nailiyyətlər
Paradoksal olsa da, qələbələr də bəzən qıcıq yaradır. İşdə yüksəliş, idman nailiyyətləri və ya uşaqların uğurları haqqında danışmaq bəzi qohumlarda öz nailiyyətləri ilə müqayisə kompleksi yaradır.
“Sadəcə bəxtin gətirdi”, “Bizim uşaqlar da belə ola bilərdi” kimi ifadələr sevincinizi kölgədə qoya bilər.
6. Şəxsi inanclar və həyat tərzi
Veganlıq, dini baxışların dəyişməsi, yoqa və ya digər zövqlər ailə ənənələri ilə ziddiyyət təşkil etdikdə, yaxın çevrədə sərt reaksiya yarada bilər. Yaşlı nəsil dəyişiklikləri çox vaxt şəxsi təhqir kimi qəbul edir, uzun mübahisələr və “səni doğru yola qaytarmaq” cəhdləri başlayır.
7. İntim həyat
Bu mövzu tamamilə tabu sayılmalıdır. Partnyorunuzla münasibətlərə dair şəxsi detallar qohumlar üçün həm narahatlıq, həm də qarışma meyli yaradır. Üstəlik, belə məlumatların ailə içində şayiəyə çevrilmə riski də yüksəkdir.
Nəticə
Susmaq — gizlətmək deyil, hikmətli sərhəd yaratmaqdır. Psixoloqlar buna “sağlam şəxsi sərhədlər” deyir. Həyatını hamı ilə bölüşmək xoşbəxtlik gətirmir; xoşbəxt insanlar nəyi, kimlə və nə qədər paylaşacağını düzgün seçməyi bacarırlar.
