İnteqrasiya Edilmiş Tibb Mərkəzi: “Aztürk Holdinq”in Yeni Səhiyyə Layihəsi
Azərbaycanın aparıcı biznes qurumlarından olan “Aztürk Holdinq” Çin ilə səhiyyə sahəsində strateji əməkdaşlığını genişləndirərək ölkədə yeni səhiyyə infrastrukturunun qurulmasına yönəlmiş mühüm layihəyə imza atıb.
Xpress.az xəbər verir ki, bu əməkdaşlıq, iki ölkə arasında möhkəm tərəfdaşlıq münasibətlərinin inkişafında növbəti addım kimi qiymətləndirilir.
Şirkətin rəhbəri Güləli Bağırov bildirib ki, həyata keçiriləcək layihə Prezident İlham Əliyevin rəhbərliyi ilə aparılan sistemli islahatların nəticəsi olaraq mümkün olub. Onun sözlərinə görə, ölkədə formalaşdırılmış şəffaf və rəqabətli iqtisadi mühit yerli və xarici sərmayəçilər üçün geniş imkanlar açır.
Çinlə birgə integrasiya edilmiş tibb mərkəzi - Yeni səhiyyə modeli
2025-ci il dekabrın 10-da Çin tərəfinin ən böyük xəstəxana şəbəkəsinin nümayəndələri ilə aparılmış danışıqlar nəticəsində “Aztürk Holdinq” Azərbaycanın səhiyyə sektorunda yeni mərhələ açacaq mühüm addım atıb. Razılaşmaya əsasən, ölkədə ənənəvi Çin təbabəti ilə müasir Qərb tibbinin birləşdiriləcəyi yeni İnteqrasiya edilmiş tibb mərkəzi yaradılacaq.
Mərkəz yalnız müalicə xidmətləri göstərməyəcək, həm də tədqiqat, təlim və profilaktik səhiyyənin inkişafı üzrə regional bir baza rolunu oynayacaq. Bu layihənin səhiyyə turizminə də ciddi töhfə verəcəyi gözlənilir.
Sosial məsuliyyətli investisiya strategiyası
“Aztürk Holdinq”in bu addımı şirkətin davamlı inkişaf, sosial məsuliyyət və beynəlxalq əməkdaşlıq prinsiplərini prioritet seçdiyini göstərir. Layihə həm səhiyyə sektorunun modernləşdirilməsinə, həm də Azərbaycan-Çin arasında elm, texnologiya və iqtisadi əlaqələrin daha da möhkəmləndirilməsinə xidmət edəcək.
Şirkət bildirir ki, bu təşəbbüs Prezident İlham Əliyevin siyasətinə uyğun olaraq yerli sahibkarlığın dəstəklənməsi və xarici investisiyaların cəlb edilməsi istiqamətində atılan addımlardan biridir.
Sağlamlıq diplomatiyasında yeni dövr
Azərbaycan və Çin arasında sağlamlıq sahəsində əməkdaşlığın genişlənməsi iki ölkə arasında sağlamlıq diplomatiyasının yeni mərhələsinin başlandığını göstərir. “Aztürk Holdinq” gələcəkdə də bu prosesdə aktiv iştirak etməyi planlaşdırır.
Şirkətin rəhbəri Güləli Bağırov qeyd edib ki, yeni tibbi mərkəz Azərbaycanın səhiyyə sisteminə müasir standartlara uyğun xidmətlər gətirəcək və ölkənin səhiyyə turizmi potensialını artıracaq.
