Hansı anlarda hansı xoşbəxtlik hormonu sizi sevindirir?

Alimlərin araşdırmalarına görə, insanın əhval-ruhiyyəsi yaxşı olmadıqda, sadə və yüngül fiziki hərəkətlər belə xoşbəxtlik hormonlarının səviyyəsini artırır.

Mütəxəssislər bildirirlər ki, xoşbəxtlik hissinin formalaşmasında əsas rol oynayan maddələr serotonin, dopamin, oksitosin və endorfinlərdir.

Serotonin əsasən günəş işığına məruz qalanda, insan özünü dəyərli və faydalı hiss edəndə, daxili sakitlik və razılıq duyduqda yaranır. Bu hormon ruh halını stabilləşdirir, stressi azaldır və uzunmüddətli məmnunluq hissi yaradır.

Dopamin uğur, nailiyyət və məqsədə çatma ilə bağlıdır. İnsan hər hansı bir işi başardıqda, mükafat aldıqda və ya qarşısına qoyduğu məqsədə yaxınlaşdığını hiss etdikdə dopamin ifraz olunur. Bu hormon motivasiyanı artırır, hərəkətə keçməyə və daha çox çalışmağa stimul verir.

Oksitosin sevgi və bağlılıq hormonudur. O, səmimi ünsiyyət zamanı, sevdiklərimizlə fiziki və emosional yaxınlıq quranda və güvən hissi yarandıqda aktivləşir. Qucaqlanma, anlayış və qarşılıqlı dəstək oksitosinin artmasına səbəb olur və insanda daxili rahatlıq yaradır.

Endorfinlər isə əsasən fiziki aktivlik, gülüş və yaradıcı fəaliyyət zamanı ifraz olunur. Bu hormonlar ağrını azaldır, bədəndə yüngüllük və ani sevinc hissi yaradır. İdmanla məşğul olan insanların özlərini enerjili və pozitiv hiss etmələrinin səbəbi məhz endorfinlərin artmasıdır.

Mütəxəssislər vurğulayırlar ki, xoşbəxtlik təsadüfi yaranan hal deyil. İnsan həyat tərzi və gündəlik davranışları ilə onu formalaşdırır. Sağlam ünsiyyət, mənalı fəaliyyət, aktiv həyat və müsbət emosiyalar orqanizmdə xoşbəxtlik hormonlarının təbii şəkildə yaranmasına şərait yaradır.

Xpress.az