Telefonunuz izlənilirmi?- Mütəxəssislər əsas əlamətləri AÇIQLAYIR

Xpress.az xəbər verir ki, Roskachestvo mütəxəssisləri smartfonun haker hücumuna məruz qalıb-qalmadığını müəyyən etməyin yollarını izah ediblər. Onların sözlərinə görə, telefonda baş verən bəzi dəyişikliklər potensial təhlükədən xəbər verə bilər.

İlk və ən ciddi əlamətlərdən biri kamera və ya mikrofonun istifadəçinin xəbəri olmadan işə düşməsidir. Əgər telefonunuz öz-özünə səs yazır və ya video çəkirsə, bu, haker müdaxiləsinin göstəricisi ola bilər. Zənglər zamanı eşidilən ağ səs-küy və ya qəribə səslər də gizli dinləmədən xəbər verə bilər.

Digər mühüm əlamət batareyanın sürətlə boşalmasıdır. Əgər batareya əvvəlki ilə müqayisədə daha tez tükənirsə, səbəb arxa planda işləyən virus və ya casus proqram ola bilər. Foto qalereyada sizin çəkmədiyiniz ekran görüntüləri və ya videoların görünməsi də telefona icazəsiz giriş ehtimalını artırır.

Mütəxəssislər naməlum tətbiqlərin yaranmasına da diqqət yetirməyi tövsiyə edirlər. Xüsusilə etibarsız mənbələrdən yüklənmiş proqramlar zərərli ola bilər və hakerlərin telefona daxil olmasına şərait yarada bilər.

Təhlükə aşkar edildiyi halda, telefonu zavod parametrlərinə qaytarmaq məsləhət görülür. Bu addım zərərli proqramların silinməsinə kömək edir. Eyni zamanda, vacib hesabların parollarını dəyişmək və etibarlı antivirus proqramı quraşdırmaq tövsiyə olunur ki, təkrar yoluxma riski minimuma endirilsin.

Qeyd edək ki, daha əvvəl Brief24 fırıldaqçıların mənzil-kommunal xidmətlər adı altında insanları aldadaraq telefonlara nəzarət əldə etdiklərini bildirmişdi.