Karakasda gecə partlayışları: sakinlər qorxu içində

Yanvarın 3-ü, gecə saat 02:00-dan sonra Venesuelanın paytaxtı Karakasda sakinləri qorxuya salan hadisələr baş verib. Bir neçə mənbənin məlumatına görə, şəhərin müxtəlif rayonlarında ən azı yeddi güclü partlayış qeydə alınıb və aşağı uçan hərbi təyyarələrin səsləri eşidilib.

Xpress.az xarici KİV-lərə istinadən xəbər  verir ki, hadisə əsasən Karakasın cənubunda, böyük hərbi bazalar və hava limanları yaxınlığında baş verib. Şahidlərin videolarında duman sütunları və gecə səmasında parıltılar görünür, bəzi rayonlarda isə elektrik enerjisi kəsilib.

Partlayışların səbəbi barədə hələ rəsmi açıqlama verilməyib. ABŞ və Venesuela rəhbərliyi arasındakı gərgin münasibətlər bu hadisə ilə bağlı suallar yaradıb. Son aylarda ABŞ ordusu Karib dənizində geniş hərbi qüvvə yerləşdirib və narkotik qaçaqmalçılığına qarşı əməliyyatlar aparır. Vaşinqton Venesuelanı narkotik ticarəti ilə əlaqədə olmaqda ittiham edir, Maduro hökuməti isə bu iddiaları rədd edərək ABŞ-ı ölkənin neft ehtiyatlarını ələ keçirmək cəhdində günahlandırır.

Hazırda Karakasdakı partlayışların dəqiq səbəbi və məqsədi məlum deyil. Hadisənin tam mənzərəsi yalnız gələcək araşdırmalar nəticəsində müəyyənləşəcək.