2026-cı ilin ilk günlərində ölkə kütləvi etiraz dalğası ilə silkələndi İRAN ALOVLANIR:
2026-cı ilin ilk günlərindən etibarən dünyanın bir sıra ölkələrində ictimai-siyasi gərginliklərin artdığı müşahidə olunur. Bu baxımdan diqqət mərkəzində olan ölkələrdən biri də İrandır. Yanvar ayının əvvəlində ölkənin müxtəlif bölgələrində başlayan kütləvi etiraz aksiyaları qısa müddətdə genişmiqyaslı ictimai-siyasi gərginliyə çevrilib.
Məlumata görə, etirazlar əsasən dərinləşən iqtisadi böhran, milli valyutanın sürətlə dəyər itirməsi, inflyasiyanın yüksəlməsi və əhalinin sosial rifahının pisləşməsi fonunda başlayıb. Aksiyaların ilkin mərhələsi ötən ilin dekabr ayının sonlarında Tehranın Böyük Bazarında mağaza sahiblərinin fəaliyyətini dayandırması ilə start götürüb.
Qısa zaman ərzində narazılıq dalğası paytaxtla yanaşı İsfahan, Şiraz, Qom, Məşhəd və digər iri şəhərlərə də yayılıb. Küçələrə çıxan vətəndaşlar həyat şəraitinin ağırlaşmasından, qiymətlərin kəskin bahalaşmasından və işsizliyin artmasından narazılıqlarını ifadə ediblər.
Bəzi bölgələrdə aksiyalar təhlükəsizlik qüvvələri ilə qarşıdurmalarla müşayiət olunub. Yerli və beynəlxalq mənbələrin məlumatına əsasən, baş verən insidentlər zamanı ölən və yaralananların olduğu, onlarla şəxsin saxlanıldığı bildirilir. Rəsmi qurumlar isə hələlik hadisələrlə bağlı dəqiq rəqəmlər açıqlamayıb.
Qeyd olunur ki, ilkin olaraq iqtisadi tələblərlə başlayan etirazlar sonradan daha geniş sosial və siyasi məzmun alıb. Nümayişlər zamanı hakimiyyət əleyhinə şüarların səsləndirildiyi, bəzi ərazilərdə dövlət qurumlarının qarşısında toplaşmaların keçirildiyi bildirilir.
İran rəsmiləri vəziyyətə münasibət bildirərək, ictimai asayişin pozulmasına yol verilməyəcəyini bəyan ediblər. Bununla yanaşı, beynəlxalq ictimaiyyət də ölkədə baş verən prosesləri diqqətlə izləyir, insan haqları ilə bağlı narahatlıqlar səsləndirilir.
Afaq Qurbanzadə
Xpress.az
