Rusiyanın Kiyevə niyə zərbə endirmədiyi məlum olub
“Rossiya Seqodnya” media qrupunun və RT televiziya kanalının baş redaktoru Marqarita Simonyan Rusiyanın Kiyevə zərbələr endirməməsinin səbəbi ilə bağlı fikirlərini bölüşüb.
Xpress.az xəbər verir ki, o, bu barədə “Rossiya 1” telekanalında yayımlanan “Vladimir Solovyovla bazar axşamı” verilişində danışıb.
Simonyanın sözlərinə görə, Kiyev Rusiyanın tarixi və mənəvi dəyərləri ilə sıx bağlıdır:
“Düşünmürəm ki, Kiyevi bombalayırıq. Çünki orada Xreşatik var, Lavra var. Bunlar bizim üçün hər şey deməkdir. Əgər sabah hamısı bizim deyilsə, bir gün sonra olacaq”, – deyə o bildirib.
Simonyan vurğulayıb ki, bu fikirləri dövlət rəsmisi kimi deyil, jurnalist və fərdi şəxs olaraq ifadə edir.
Bundan əvvəl Marqarita Simonyan Ukrayna Silahlı Qüvvələrinin Yeni il gecəsi kafeyə hücumu ilə bağlı hadisədə iştirak edənlərin hamısının tapılacağına söz vermişdi.
