Ay torpağında yer kürəsinin gizli arxivi tapıldı
Ay torpağında Yer kürəsinin gizli arxivi aşkarlandı
Apollo missiyaları zamanı tapılan su və azotun mənbəyinin Yer atmosferi olduğu müəyyən edilib. Bu araşdırma onilliklərdir davam edən böyük bir sirrə tam aydınlıq gətirib.
Günəş küləkləri Yer atmosferindən qopardığı hissəcikləri milyardlarla ildir Ay səthinə daşıyır. Astronomlar tərəfindən yayımlanan yeni elmi tədqiqat Yerə məxsus molekulların Ay torpağına qarışdığını faktlarla sübut edib.
Günəşdən gələn yüklü hissəcik axınları atmosferdən qopardığı maddələri kosmik boşluğa sürükləyərək Yer peykinə çatdırır. Alimlər bu proses sayəsində Yer atmosferinə aid komponentlərin Ay səthində toplandığını müəyyən ediblər.
Apollo nümunələrindəki sirr açıldı
Apollo missiyaları zamanı Ay səthindən Yerə gətirilən nümunələrdə su, karbon qazı, helium və azot kimi maddələr aşkar edilmişdi. Tədqiqatçılar uzun illər müzakirə olunan bu maddələrin əsas mənbəyinin böyük ölçüdə Yer atmosferi olduğunu müəyyənləşdiriblər.
Yer kürəsinin güclü maqnit sahəsi, düşünüldüyünün əksinə olaraq, hissəcik ötürülməsini dayandırmayıb, əksinə bu prosesi daha da asanlaşdırıb. Yeni araşdırma göstərib ki, maqnit qalxanı formalaşdıqdan sonra da maddə mübadiləsi fasiləsiz şəkildə davam edib.
Eric Blackman nəticələri şərh etdi
Rochester Universitetinin professoru Eric Blackman bildirib ki, Yer kürəsi oksigen və azot kimi uçucu qazları milyardlarla il ərzində Ay səthinə ötürüb. Professor Yer ilə Ay arasında çox uzun geoloji dövrlər boyunca maddə mübadiləsinin baş verdiyini vurğulayıb.
Ay hər ay orbitdə hərəkəti zamanı Yer kürəsinin “maqnit quyruğu” adlandırılan xüsusi zonadan keçir. Bu keçid zamanı atmosferdən qopan hissəciklər heç bir maneə ilə qarşılaşmadan birbaşa Ay səthinə çatır.
Ay torpağı kimyəvi yaddaşdır
Atmosferi olmayan Ay səthi üzərinə düşən bu yad maddələri torpaq qatlarının dərinliklərində qoruyub saxlayır. Alimlər bildiriblər ki, Ay torpağı Yer kürəsinin qədim atmosferi haqqında son dərəcə dəyərli bir kimyəvi arxiv rolunu oynayır.
Nature Communications Earth & Environment jurnalında dərc olunan araşdırma iki göy cismi arasındakı əlaqəni elmi şəkildə təsdiqləyib. Mütəxəssislər 2005-ci ildə Tokio Universitetində irəli sürülən nəzəriyyələrin bu yeni məlumatlarla doğrulandığını açıqlayıblar.
