Yarım əsrdən sonra aya insan göndərməyə hazırlaşır NASA
1972-ci ildən sonra ilk insanlı Ay missiyası üçün geri sayım başlayıb
NASA dörd astronavtı Ay orbitinə aparacaq yeni nəsil nəhəng raketinin yanacaq doldurma sınağı üçün iki günlük geri sayım prosesinə start verib. Bu kritik test ekipajın uçuş tarixinin müəyyənləşdirilməsi baxımından ən vacib mərhələ hesab olunur.
Xəstəlik riskinə qarşı Hyustonda karantində saxlanılan missiya komandiri Rid Uayzmen və heyəti 1972-ci ildən bəri Aya göndəriləcək ilk insanlar olacaq. Ekipaj sınaq prosesini bazadan izləyir və raket uçuş üçün rəsmi təsdiq aldıqdan sonra Kennedi Kosmik Mərkəzinə
Floridada müşahidə olunan kəskin soyuqlar səbəbindən yanacaq testi və mümkün buraxılış tarixi iki gün təxirə salınıb. Hündürlüyü 98 metr olan “Space Launch System” (SLS) raketi iki həftə əvvəl start meydançasına çıxarılıb.
Sistemlər xüsusi isitmə qurğuları vasitəsilə aşağı temperaturdan qorunur. Bu gün keçiriləcək yanacaq sınağı uğurla başa çatarsa, ən erkən buraxılış tarixinin 8 fevral olacağı bildirilir.
Planlaşdırılan sınaq zamanı raketin çənlərinə təxminən 2,6 milyon litr həddindən artıq soyudulmuş yanacaq doldurulacaq. Proses mühərriklərin işə salınmasına 30 saniyə qalmış dayandırılacaq.
ABŞ və Kanadadan olan astronavtları daşıyacaq “Orion” kapsulu Ay ətrafında dövrə vurduqdan sonra təxminən 10 gün davam edəcək missiyanı Sakit okeana enişlə tamamlayacaq.
NASA üçün yeganə maneə hava şəraiti deyil. Fevral ayı ərzində buraxılış üçün yalnız müəyyən günlərdə uyğun zaman pəncərəsi mövcuddur. Bundan əlavə, Beynəlxalq Kosmik Stansiyaya (ISS) yeni ekipajın göndərilməsi də qrafiki daha da sıxlaşdırır.
Missiya rəhbərliyi bildirir ki, 11 fevrala qədər buraxılış baş tutarsa, Ay missiyasına prioritet veriləcək.
