“Bir Elin Manifesti” müsabiqəsinin qalibləri MÜKAFATLANDIRILDI - FOTO
Qərbi Azərbaycan İcmasının inzibati binasında “Bir Elin Manifesti” adlı Qərbi Azərbaycan mövzusunda hekayə janrı üzrə Birinci Ümumrespublika Müsabiqəsinin yekunlarına həsr olunmuş tədbir və qaliblərin mükafatlandırılması mərasimi keçirilib.
Xpress.az xəbər verir ki, müsabiqə Qərbi Azərbaycan İcmasının Qadınlar Şurasının təşkilatçılığı ilə reallaşdırılıb. Layihənin ideya müəllifi Qadınlar Şurasının sədri, Milli Məclisin deputatı Məlahət İbrahimqızıdır. Tərəfdaş qurumlar sırasında AMEA Nizami Gəncəvi adına Ədəbiyyat İnstitutu, Azərbaycan Yazıçılar Birliyi, “Ədəbiyyat qəzeti” və “Modern.az” informasiya agentliyi var.
Məlahət İbrahimqızı çıxışında layihənin uğurla başa çatdığını bildirərək bu təşəbbüsün ədəbi mühitdə əhəmiyyətli hadisə olduğunu vurğulayıb. O. müsabiqənin ərsəyə gəlməsi prosesindən danışıb, əməyi keçən hər kəsə təşəkkürünü bildirib. Millət vəkili “Bir Elin Manifesti” adının təsadüfi seçilmədiyini qeyd edərək burada bir elin ağrılı taleyinin, yurd həsrətinin və tarixi yaddaşının bədii formada ifadə olunduğunu deyib. Deputat təqdim olunan hekayələrin motivlərinə toxunaraq müəlliflərin mövzuya həssas və məsuliyyətli yanaşdığını vurğulayıb, media tərəfdaşlarına, xüsusilə “Modern.az” informasiya agentliyinə dəstəyə görə minnətdarlığını ifadə edib.
Qərbi Azərbaycan İcması İdarə Heyətinin sədri, millət vəkili Əziz Ələkbərli layihənin yekun mərasiminin icma üçün əlamətdar hadisə olduğunu bildirib. O, vətən həsrəti anlayışının müxtəlif mərhələlərindən bəhs edərək bədii ədəbiyyatın milli yaddaşın qorunmasında xüsusi rol oynadığını qeyd edib və yazılan hekayələrin gələcəkdə dərsliklərdə yer almasının vacibliyini diqqətə çatdırıb.
Qərbi Azərbaycan İcmasının Müşahidə Şurasının sədri, professor Misir Mərdanov Qərbi Azərbaycanda baş verən hadisələrin uzun illər bədii şəkildə yetərincə qələmə alınmadığını qeyd edib, bu kimi təşəbbüslərin davamlı olmasının zəruriliyini vurğulayıb və müsabiqənin təhsil müəssisələrində də təşviq edilməsini təklif edib.
Qərbi Azərbaycan İcmasının Ziyalılar Şurasının sədr müavini, Azərbaycanda Atatürk Mərkəzinin direktoru, akademik Nizami Cəfərov “manifest” anlayışının ədəbi və ictimai məzmunundan danışaraq “Bir Elin Manifesti” ifadəsinin geniş ideya yükü daşıdığını bildirib. O, müsabiqənin təşkilində Məlahət İbrahimqızının rolunu xüsusi qeyd edib.
Qərbi Azərbaycan İcmasının İdarə Heyətinin üzvü, Dərələyəz mahalının Keşkənd rayon İcmasının sədri, professor Mahirə Hüseynova (Nağıqızı) gəncləri yazmağa, öyrənməyə və tarixi yaddaşı qorumağa çağırıb. Qərbi Azərbaycan İcması İdarə Heyətinin sədr müavini, Milli Məclisin deputatı, ekspert Şurasının üzvü Hikmət Babaoğlu isə ədəbi müstəvidə milli mövqenin ifadəsinin əhəmiyyətinə toxunub.
Müsabiqənin şərtlərinə əsasən, 40 yaşadək müəlliflərin daha əvvəl heç bir yerdə çap olunmayan hekayələri təqdim edilib. Münsiflər heyətinin qərarı ilə Qaliblər müəyyənləşdirilib:
I yerin qalibi – İlhamə Nasir qızı Kərimova, “Sonuncu pərdə” hekayəsi,
II yerin qalibi – Könül Nəriman qızı Həsənova, “Əsa” hekayəsi,
III yerin qalibi – Samir Arif oğlu Abdullayev, “Onun adı Lena idi” hekayəsi.
Həvəsləndirici mükafata layiq görülən müəlliflər:
– Həmid Məzair oğlu Piriyev – “Araz da qan rəngindədir, görürsən?”
– Salman Vəli oğlu Balakişiyev – “Gəlinlik donu”, “Möcüzə”
– Nurlana Umudvar qızı Məmmədova – “Zəngi çayının səsi”
– Şəmsi Adilxan oğlu Qocayev – “Xəritənin sirri”.
Kitabda Mahirə Hüseynova, Musa Quliyev, Sona İsmayılova, Şəmsi Qocayev, Təhminə Verdiyeva, Ramiz Nəsirov, Salman Balakişiyev, Könül Həsənova, Rufik İsmayılov, Xumar Ələkbərova, İlhamə Nasir, Ayşən Məmmədrzayeva, Rəna Haqverdiyeva, Kəmalə Həsənova, Azər Məmmədov, Neymət Rüstəmli, Həmid Piriyev, Samir Abdullayev, Samirə Şükürova, Nehir Akpolat, Polad Poladov, Nurlana Məmmədova, Mirzəfər Qurbanov, Mədinə Hüseynova, Atanur Nəbiyeva, Əli Kaan Əsgər, Mehriban Cəfərova, Zinyət Əhmədova, İlahə Cəfərova, Aysel Məmmədova, Azər Dəmirçiyev və İslam Əlizadə kimi müəlliflər də yer alıblar.
Tədbirdə qaliblərə diplomlar və pul mükafatları təqdim olunub. Müsabiqənin nəticələrinə əsasən seçilmiş hekayələr bir neçə xarici dilə tərcümə edilərək kitab halında nəşr olunub və mərasim çərçivəsində təqdim edilib.
Tədbirin sonunda xatirə şəkilləri çəkdirilib və layihənin gələcəkdə davam etdiriləcəyi bildirilib.
