Göyçayda yerli özünüidarəetmə və multikultural dəyərlər müzakirə olunub
92 saylı Göyçay-Ağdaş seçki dairəsi üzrə Milli Məclisin deputatı Məzahir Əfəndiyev 25 fevral 2026-cı il tarixində Azərbaycan Respublikası Ədliyyə Nazirliyinin Göyçay Regional Ədliyyə şöbəsində keçirilən görüşdə iştirak edib. Görüşün məqsədi Nazirliyin Bələdiyyələrlə İş Baş İdarəsinin illik məruzəsinin və cari il üzrə nəzərdə tutulan fəaliyyət planının müzakirəsi olub.
Tədbirdə Göyçay Regional Ədliyyə şöbəsinin rəisi Elnur Əsədov, Milli Məclisin Dövlət quruculuğu, inzibati və hərbi qanunvericilik şöbəsinin sektor müdiri Cavid İskəndərov, Nazirliyin Bələdiyyələrlə İş Baş İdarəsinin məsləhətçisi Fəqan Murtuzayev və digər məsul əməkdaşlar iştirak ediblər.
Çıxış edən M. Əfəndiyev yerli özünüidarəetmə institutunun formalaşmasında Ümummilli Lider Heydər Əliyevin rolunu xüsusi vurğulayıb. Deputat bildirib ki, Azərbaycanın Konstitusiyasında yerli özünüidarəetmənin təsbit olunması və bu sahədə qanunvericilik bazasının yaradılması məhz Heydər Əliyevin adı ilə bağlıdır. Onun sözlərinə görə, 1993-cü ildən sonra həyata keçirilən ardıcıl islahatlar nəticəsində bələdiyyələrin cəmiyyətdə rolu daha da artıb.
Millət vəkili təmsil etdiyi Regional məsələlər komitəsinin son illərdə yerli özünüidarəetmənin inkişafı ilə bağlı qəbul olunmuş qanun layihələri barədə də məlumat verib. Digər çıxış edənlər isə bələdiyyələrin fəaliyyətinin təkmilləşdirilməsi istiqamətində görülən işlərdən danışıblar.
Həmin gün deputat Ramazan ayı münasibətilə Göyçay rayonunda din xadimləri və dini icma nümayəndələri ilə iftar süfrəsi arxasında görüş keçirib. “Multikultural dəyərlərdə İslam dininin rolu” mövzusunda təşkil olunan görüşdə Azərbaycan Respublikası Dini Qurumlarla İş üzrə Dövlət Komitəsinin Mərkəzi Aran Regional bölməsinin müdiri Natiq Əfəndiyev, baş məsləhətçi Əzim Rəfiyev, Qafqaz Müsəlmanları İdarəsinin bölgə qazısı Əli Məmmədov, qurumun Göyçay və Ağdaş rayonları üzrə səlahiyyətli nümayəndələri, eləcə də dini icma rəhbərləri iştirak ediblər.
M. Əfəndiyev çıxışında Azərbaycanın İslam dünyasının tarixi və mədəni mərkəzlərindən biri olduğunu qeyd edərək, ölkəmizdə multikultural dəyərlərin qorunduğunu və müxtəlif dinlərin nümayəndələrinin birgə, qarşılıqlı hörmət şəraitində yaşadığını vurğulayıb. O, əldə olunan nailiyyətlərin xalqın birliyi və həmrəyliyi fonunda ölkənin ərazi bütövlüyünün və suverenliyinin təmin olunmasında mühüm rol oynadığını diqqətə çatdırıb.
Deputat həmçinin Prezident İlham Əliyev və Birinci vitse-prezident Mehriban Əliyeva tərəfindən dini-mənəvi dəyərlərə göstərilən diqqət və qayğıdan bəhs edib, Qarabağda aparılan quruculuq işləri çərçivəsində dini abidələrin bərpasının xüsusi önəm daşıdığını bildirib.
Görüş Qurani-Kərimdən ayələrin səsləndirilməsi ilə davam edib. Sonda iştirakçılar təşəbbüsə görə deputata təşəkkürlərini bildiriblər.
Məzahir Əfəndiyev 92 saylı Göyçay-Ağdaş seçki dairəsinin sakinlərini müqəddəs Ramazan ayı münasibətilə təbrik edərək, onlara əmin-amanlıq, birlik və xeyirxah əməllər arzulayıb.
