Cəbrayılovun adı Epşteyn sənədlərində hallandı

Jeffrey Epstein işi ilə bağlı açıqlanan sənədlər arasında rusiyalı iş adamı Umar Cəbrayılovun fotoşəkilləri də yer alıb.

“Channel 360” telekanalı “Baza”ya istinadən xəbər verir ki, yetkinlik yaşına çatmayanları cinsi istismar etməkdə ittiham olunan mərhum milyarder Epsteinin iş materiallarında Cəbrayılovun şəkilləri aşkarlanıb.

İş adamı fotoşəkillərin bu sənədlərə necə düşdüyündən xəbərsiz olduğunu bildirib. Jurnalistlərə açıqlamasında Cəbrayılov Epsteinlə tanışlığını təsdiqləsə də, onunla yaxın əlaqəsinin və ya dostluq münasibətinin olmadığını vurğulayıb.

Cəbrayılovun sözlərinə görə, fotonun 1990-cı illərdə karate məşqi zamanı çəkildiyi ehtimal olunur. Lakin o, şəklin dəqiq harada və hansı şəraitdə çəkildiyini xatırlamadığını deyib.

Bundan əvvəl Federal Təhqiqat Bürosu (FTB) Epstein işi ilə bağlı materialları yaymağa başlayıb. Həmin sənədlər arasında ABŞ-ın keçmiş prezidenti Bill Clintonun da adı çəkilir.

Eyni zamanda “Epsteinin əlaqə kitabı” kimi tanınan sənəd də dərc olunub. United States Department of Justice tərəfindən yayımlanan, 550 səhifədən çox materialı əhatə edən sənədlərin bir hissəsi, o cümlədən Nyu-York böyük münsiflər heyətinə aid bölmələr qara zolaqlarla redaktə edilib.

Xpress.az