Müştərilər kassada necə aldadılır? - Pulunuzu geri qaytarmağın yolları
Mağazada məhsulu bir qiymətə görürsünüz, lakin kassada ödəniş edərkən daha yüksək məbləğlə qarşılaşırsınız. Məsələn, 80 rubla götürdüyünüz süd kassada 90 rubla, 230 rubla gördüyünüz pendir isə birdən 250 rubla hesablanır. Bu hal bir çox alıcıya tanışdır və düşündüyünüzdən daha tez-tez baş verir.
Ekspertlərin fikrincə, kassada artıq ödəniş halları kifayət qədər yayılıb. Əksər müştərilər qiymət etiketi ilə qəbzdəki məbləği müqayisə etmir və nəticədə fərqi hiss etmir. Bu diqqətsizlik isə bəzi hallarda mağazalar üçün əlavə qazanc mənbəyinə çevrilir. Ən geniş yayılmış üsullardan biri məhz qiymət etiketi ilə manipulyasiyadır.
Tipik vəziyyət belə olur: məhsul rəfdə bir qiymətlə təqdim edilir, lakin kassada skan edilərkən daha baha çıxır. Müştəri bunu aşkar edib etiraz etdikdə, adətən mağaza işçiləri qiyməti dərhal düzəldir və məhsulu etikətdə göstərilən məbləğə satırlar. Lakin böyük alış-veriş zamanı hər məhsulu yoxlamaq çətin olduğundan, bu kimi hallar çox vaxt diqqətdən kənarda qalır.
Eyni mağazalarda belə hadisələrin tez-tez təkrarlanması problemin təsadüfi deyil, sistemli xarakter daşıdığını göstərir. Kassirlər tərəfindən “qiymət yenilənməmişdi” və ya “səhvən köhnə qiymət skan olundu” kimi izahlar isə olduqca yayılıb.
Qanunvericiliyə görə, satıcı məhsul haqqında düzgün və tam məlumat verməyə borcludur. Qiymət isə bu məlumatların əsas hissəsidir. Qiymət etiketi alıcıya təqdim olunan rəsmi təklif sayılır və mağaza həmin qiymətlə satış etməlidir. Kassada daha yüksək məbləğin çıxması bu qaydanın pozulması deməkdir.
Belə hallarla qarşılaşdıqda alıcı:
məhsulun etiketi ilə kassadakı qiymət fərqini qeyd etməli
mağaza əməkdaşına müraciət etməli
zərurət yaranarsa rəhbərliyə və ya müvafiq qurumlara şikayət etməlidir
Ən vacib məqam isə budur: əgər kassada göstərilən qiymət daha yüksəkdirsə, alıcı məhsulu etikətdə qeyd olunan qiymətə almaq və ya artıq ödənilmiş məbləğin geri qaytarılmasını tələb etmək hüququna malikdir.
Mütəxəssislər alıcılara tövsiyə edir ki, alış-veriş zamanı qəbzi yoxlamağı vərdiş halına çevirsinlər. Çünki kiçik görünən fərqlər zamanla ciddi maliyyə itkisinə səbəb ola bilər.
Nəticə olaraq, kassadakı qiymət uyğunsuzluğu sadə texniki səhv kimi görünsə də, bu, istehlakçı hüquqlarının pozulmasıdır. Diqqətli olmaq və hüquqlarınızı bilmək isə bu cür halların qarşısını almağın ən effektiv yoludur.
Xpress.az
