Avtobus qəza törədərsə... – Sərnişinlərə sığorta ödənişi bu qaydada EDİLƏCƏK

Xəbər verdiyimiz kimi Azərbaycan Prezidenti İlham Əliyev Milli Məclisin martın 3-də qəbul etdiyi "Avtomobil nəqliyyatı haqqında" qanunda dəyişiklik edilməsi haqqında qanunu təsdiqləyib.

Yenilənmiş qanuna əsasən, aprelin 1-dən ölkədaxili sifarişli daşımalara buraxılış vəsiqəsi almaq istəyənlər bəzi sənədləri təqdim etmək məcburiyyətindədirlər. Tələb olunan yeni sənədlərdən biri də sərnişinlərin fərdi qəza sığortasıdır.

Bəs sərnişinlərin fərdi qəza sığortasını hansı tərəf icra edəcək?

Suala aydınlıq gətirən Azərbaycan Sığortaçılar Assosiasiyasının ekspert qrupunun üzvü Emil Ağabağırov Bizim.Media-ya deyib ki, sərnişinlərin fərdi qəza sığortası əslində icbaridir:

“Bu sığorta növünü yeni qaydalara görə hər bir daşıyıcı əldə etməlidir. Yəni bundan sonra yerüstündə sərnişin daşıma ilə məşğul olan hüquqi və fiziki şəxslər ilkin şərtlərdən biri kimi sərnişinlərin qəza sığortasını əldə etməlidirlər”.

Sərnişinlərin fərdi qəza sığortası nəyə təminat verir?

Müsahibimiz bildirib ki, sərnişinlərin fərdi qəza sığortası insanları hər cür bədbəxt hadisədən maddi cəhətdən sığortalayır:
 

“Sərnişin fərqi yoxdur dayanacaqda, platformada və yaxud avtobusda xəsarət alarsa, o zaman həmin şəxs sığorta ödənişi ala bilər. Nəzərə alaq ki, bu tip qəzalarda sərnişin sağlamlığını da itirə bilər. Ona görə də yeni qaydalara görə bütün qəzalar sığortalanacaq və hadisənin ölçüsünə görə də zərərçəkmişə ödəniş ediləcək.

Sərnişinlərin fərdi qəza sığortası avtomobilin icbari sığortasından onunla fərqlənir ki, icbari sığortada yalnız avtomobillərdə zərər görmüş sığorta ödənişi ala bilirdi. Amma sərnişinlərin fərdi qəza sığortasına görə bütün nəqliyyat növlərindən istifadə edənlər sığorta olunacaq və baş verə biləcək hadisə zamanı müvafiq qaydada sığorta ödənişi alacaq”.