Taksilərin sığortası ilə bağlı yeni qayda: qiymətlər artacaq? - AÇIQLAMA
Məlum olduğu kim Azərbaycan Mərkəzi Bankının qərarına əsasən, avtonəqliyyat vasitəsi taksi minik avtomobilləri ilə sərnişin daşımaları üçün istifadə edildikdə avtonəqliyyat vasitəsi sahiblərinin mülki məsuliyyətinin icbari sığortası müqaviləsi bağlanarkən ödənilməli olan birillik sığorta haqqı məbləğinin hesablanması üçün 1.5 əmsalı tətbiq ediləcək. Yeni qaydanın taksi qiymətlərinə təsiri ola bilərmi?
Məsələ ilə bağlı İqtisadiyyat.az-a açıqlama verən nəqliyyat məsələləri üzrə ekspert Eldəniz Cəfərov bildirib ki, taksi fəaliyyəti göstərməsindən asılı olmayaraq avtomobillərin icbari sığortası əsasən mühərrik həcminə görə hesablanır:
“Elektromobillərdə isə at gücünə görə hesablanır və orada müəyyən nüanslar da var: avtomobilin yeniliyi, sürücünün təcrübəsi. Bunların hamısı nəzərə alınır. Onu da qeyd edim ki, 1.5 əmsalı yüksək əmsal deyil, aşağı əmsaldır. Sadəcə indi ümumiləşdirilir. Bəzi hallarda sığorta şirkətləri taksi minik avtomobillərini sığorta etməkdən imtina edirlər. Amma indi artıq Mərkəzi Bankın tövsiyəsi ilə belə imtinalar olmayacaq və rahatlıqla taksidə istismar olunan nəqliyyat vasitələri sığortalanacaq.
Bu sığorta məbləği o qədər yüksək məbləğ deyil ki, buna görə taksilərin qiymətləri yüksəlsin. Bu, mümkün deyil. Taksi qiymətləri də hazırda sərnişinlər üçün əlçatandır, dəyişən taarifdir, normaldır. Taksi qiymətləri o amillərlə yüksəlmir. Taksiyə tələb artanda yüksəlir, tələb azalanda azalır. Yəni bu amillərlə ölçülür. İqlimə görə, sutkanın saatlarına görə, bayram günlərinə görə belə dəyişir. Şəhər mühitində işləyən avtomobilin il ərzində, xüsusən də taksinin, heç olmasa, 1 dəfə qəzası olur. Bu, qaçılmazdır. Ona görə 1,5 əmsalla hesablanması daha ədalətlidir. Yəni aşağı əmsaldır”.
Məlumat üçün bildirək ki, baza sığorta haqqı 50 manat məbləğində müəyyən olunub. Daha əvvəl sığorta haqqı məbləği hesablanarkən avtonəqliyyat vasitəsinin istifadə təyinatına görə əmsal tətbiq edilmirdi.
