TƏBİB-ə bu şəxslər rəhbərlik edəcək – SİYAHI

Xəbər verdiyimiz kimi, Prezident İlham Əliyevin Sərəncamı ilə "Tibbi Ərazi Bölmələrini İdarəetmə Birliyi" publik hüquqi şəxsin (TƏBİB) Müşahidə Şurasının tərkibi təsdiqlənib.
Sərəncama əsasən, Azərbaycan Prezidentinin sosial-iqtisadi məsələlər üzrə köməkçisi – Xalid Əhədov TƏBİB-in Müşahidə Şurasının sədri vəzifəsini icra edəcək.

Bundan əlavə, TƏBİB-in Müşahidə Şurasının üzvləri də təsdiqlənib:

- Azərbaycan Respublikası maliyyə nazirinin müavini;

- Azərbaycan Respublikası səhiyyə nazirinin müavini;

- Azərbaycan Respublikası əmək və əhalinin sosial müdafiəsi nazirinin müavini;

- Səhiyyə İşçiləri Həmkarlar İttifaqının sədri.

Xatırladaq ki, daha əvvəl TƏBİB-in Müşahidə Şurasının sədri İcbari Tibbi Sığorta üzrə Dövlət Agentliyinin İdarə Heyətinin sədri olan Zaur Əliyev idi. O, aprelin 7-də əmək və əhalinin sosial müdafiəsi nazirinin müavini təyin edilib.

Onu da qeyd edək ki, mart ayının 19-da İcbari Tibbi Sığorta üzrə Dövlət Agentliyinin səlahiyyətləri Əmək və Əhalinin Sosial Müdafiəsi Nazirliyinə (ƏƏSMN) həvalə edilib.