Bu yoldan keçərkən niyə siqnal verilir? – Sürücülər cərimələnə bilər
Gəncə şəhərində Nizami Gəncəvinin məqbərəsinə gedən əsas yolda körpünün altından keçmək, yerli əhali üçün Nizami Gəncəvinin hüzuruna gəlmək kimi qəbul edilir. Bu zaman isə gəncəlilər ehtiram məqsədilə həmin körpünün altından avtomobillə keçən zaman uzun siqnal verirlər. Bu isə onlar üçün “Salam, ey dahi!” anlamına gəlirmiş. Bu, 50 ildən artıq davam edən yazılmamış qanun kimidir. Son günlər bəzi şəxslərin siqnal verərək video çəkib paylaşması bu məsələni yenidən aktuallaşdırıb, geniş müzakirələr və mübahisələrə səbəb olub.
Mövzu ilə bağlı Pravda.az-a açıqlama verən nəqliyyat mütəxəssisi Azər Quliyevin sözlərinə görə, istər yaşayış məntəqəsində, istərsə də məntəqədən kənarda yersiz siqnal vermək 30 manat cərimədir.
O bildirib ki, bu gəncəlilərin adət-ənənəsi olsa belə, bu qaydalar çərçivəsində olmalıdır: “Nizami Gəncəvi məqbərəsinə hörmət əlaməti olaraq edirlərsə, gedib məqbərə qarşısında əklil qoya bilərlər, oradan keçəndə saxlaya bilərlər, müəyyən qaydalara uyğun davranaraq, pozmamaq şərtilə bu hörməti, ehtiramı göstərə bilərlər. Bəziləri buna yazılmamış qanun deyirlər, ancaq bu hərəkətin Nizami Gəncəviyə hansısa bir faydası yoxdur. Ancaq insanları çaşdıra bilər. Yolda gedilən zaman arxadan biri siqnal verəndə şəxs də idarəetməni itirə bilər, elə bilər ki, ötmə əməliyyatı edir və zolağı dəyişə bilər. Yersiz siqnal, məlumatlı olmayan, bilməyən sürücüləri çaşdıra bilər. Adətən yolda biri gedən zaman arxadan siqnal veriləndə çaşır və düşünə bilər ki, kiminsə zolağına çıxıb dərhal sükanı sağa-soğa çevirə bilər, anidən əyləcə basa bilər. Qanunda qeyd edilib ki, uzun səs siqnalı yol nəqliyyat hadisəsinin qarşısını almaq məqsədilə verilir. Bir də yaşayış məntəqəsindən kənarda, ötmə zamanı, sürücüləri xəbərdarlıq etmək məqsədilə, dəmir yol keçidlərində məcburi dayanan sürücüyə ətrafdan kömək çağırmaq üçün uzun səs siqnalı və 3 qısa həyəcan səs siqnalı verilə bilər. Bu hallardan başqa səs siqnalından istifadə etməyə görə İnzibati Xətalar Məcəlləsində 329-cu maddəsi ilə 30 manat cərimə nəzərdə tutulur. Həmin ərazidə də siqnal vermək doğru deyil. Ehtiram əlaməti olaraq da etik deyil. Əksinə birinə siqnal verildikdə bu, mədəniyyətsizlik kimi qarşılanır”.
