Bakıda bu ərazilərdə kirayə mənzil bazarı bahalaşıb - AÇIQLAMA

Bakıda kirayə mənzil bazarında qiymət artımı davam edir və son 5 ildə kirayə mənzil bazarında qiymətlər hər il 7-10 faiz artıb.
Bunu İqtisadiyyat.az-a açıqlamasında Azərbaycan Qiymətləndiricilər Cəmiyyətinin sədri Vüqar Oruc deyib.

Onun sözlərinə görə, ötən ay ərzində də qiymətlərdə artım müahidə edilib. V.Oruc bildirib ki, kirayə mənzil bazarına müraciətlərin artması öz növbəsində qiymətlərin də yüksəlməsinə səbəb olur:

“Rayonlardan iş yerləri ilə bağlı şəhərə axın var. Eyni zamanda hər il 50 mindən çox şəxs ali təhsil müəssisələrinə daxil olur və hər dəfə də kirayə mənzil bazarına müraciət zamanı qiymət artır və ondan sonra geriyə dönüş baş vermir”.

Mütəxəssis söyləyib ki, eyni zamanda hazırda daşınmaz əmlak bazarında investisiya yönümlülüyə də maraq artıb: “Mənzil alıb müəyyən qədər təmir edərək kirayə verənlər də çoxdur. Qəzalı və istismar müddəti bitmiş binaların sökülməsi nəticəsində də yeni binalar tikilənə qədər vətəndaşlar kirayə mənzil bazarına müraciət edirlər. Digər tərəfdən xaricdən gələn əcnəbilər kirayə mənzil bazarına müraciət edirlər. Bütün bu müraciətlər kirayə mənzil bazarında qiymətlərə təsir göstərir”.

V.Orucun sözlərinə görə, son 5 ildə kirayə mənzil bazarında qiymətlər 7-10 faiz artıb: “Qiymət artımı əsasən Bakının iş mərkəzlərinin, ali təhsil müəssisələrinin olduğu ərazilərində baş verir. Yasamal, Nərimanov, Xətai, Nəsimi, Səbail rayonlarda kirayə qiymətləri daha yüksəkdir. Binəqədi, Sabunçu, Suraxanı, Nizami rayonlarında orta qiymətlər, Xəzər, Pirallahı, Qaradağ rayonlarında isə daha aşağı qiymətlər mövcuddur. Ən çox tələb bir və otaqlı mənzillərədir”.