32 ildən sonra Ağdama dönüş: Tanınmış jurnalist doğma yurduna köçdü
Ağdam şəhərində 397 nəfərdən ibarət 110 ailəyə yeni mənzillərin açarları təqdim edilib. Köç edənlər arasında Ağdam sakini, Moderator.az-ın redaktoru, tanınmış jurnalist Pərvin Şakirqızı da var.
O, Xpress.az-a verdiyi açıqlamada bu günü illərlə həsrətlə gözlədiyini bildirib:
“Vətəndəyəm… Cənnətimdəyəm… Allah qazilərimizə can sağlığı versin, şəhidlərimizə rəhmət etsin.
1993-cü il iyulun 23-də Ağdamdan çıxanda şəhəri tərk edən sonuncu ailə biz olmuşuq. Biz getmək istəmirdik. Əmim şəhid olmuşdu, atam isə doğma torpağını tərk etmək istəmirdi. Nənəm atamı yalvar-yaxarla çıxardı: ‘Bir oğlumu şəhid verdim, səni də itirmək istəmirəm…’
Evimizdən çıxanda qapını bağladıq, açarını götürdük. Hətta soyuducunu da elektrikdən ayırdıq ki, evimizə zərər dəyməsin. Amma bilmirdik ki, o ev bir gün düşmən atəşi ilə yanacaq və biz geri qayıdanda oradan heç nə tapmayacağıq…
İllərlə o açarı sandıqlarda qoruduq. O açar bizim üçün sadəcə bir əşya deyildi – ümid idi, nisgil idi, qayıdışa inam idi. Hər dəfə ona baxanda deyirdik: ‘Biz mütləq Ağdama qayıdacağıq. Bu, bizim evimizin açarıdır.’
Bu gün o açar mənim üçün ümidimin qapısını açdı. Mən artıq Ağdamdayam. Bu hissləri sözlə ifadə etmək mümkün deyil… Şükür bu günümə. Sevincliyəm, qürurluyam…
Deməyə o qədər söz var ki… O açar bizi yaşadan, ayaqda saxlayan bir ümid idi. Nənəm Ağdam həsrəti ilə bu dünyadan köçdü. Qaynanam isə o çətin illərin ağrı-acısını yaşadı…
Amma bu gün – bütün o ağrıların, göz yaşlarının, gözləntilərin bəhrəsidir. Bu gün biz evimizdəyik…”.
