Tək analığa meyillənmə - Kişilərdən niyə İMTİNA EDİRLƏR?

Son illərdə Azərbaycanda tək analığa meyillənmə artıb, indi qadınlar həyatlarını kişisiz, yalnız övladları ilə davam etdirmək istəyirlər. Bu sosioloji problemə hətta ad da verilib – solo-analıq...

Buna qədər tənha analar anlayışı vardı.

Amma tənha analar dul qalmış və ya boşanmış qadınlara deyilirdi. Yəni taleyi gətirmədiyinə görə həyatının qalanını tənha uşaq böyütməklə davam etməli olurdu. Amma solo-analar tam əksinə: şanslı, karyerasını qurmuş, özünü maddi cəhətdən təmin etmiş və buna görə də komfort zonasını heç bir kişi ilə bölüşmək istəməyən qadınlardır. Onlar yad adamla müştərək yaşamaq istəmir, sonrakı mərhələdə hüqiqi problemlər olmasın deyə getdikcə daha çox donorlar vasitəsilə öz uşaqlarını dünyaya gətirməyi seçirlər.

Sosioloqlar bir məsələni də qabardırlar ki, bu tendensiyanın artımında qadınlarda kişilərə qarşı yaranmış inamsızlıq, boşanma zamanı uşağını itirmək qorxusu kimi səbəblər də rol oynayıb.

Sosioloq Gülnar Qurbanova Bizim.Media-ya bildirib ki, bunun bir səbəbi də “mən” anlayışının “biz” anlayışından önə keçməsidir:

“İndi qadınlar “biz” olmaq istəmir, onun həyatı və mərkəz nöqtəsi “mən”dən ibarətdir. Bu, əsasən fərdiləşmə meyli ilə bağlıdır. Ortaq həyat bölüşmək deməkdir və bu qadınlar da maddi-mənəvi heç nəyini bölmək istəmir. Tez-tez karyeraya  görə analığı təxirə salan qadınlar bu addımı atırlar. Onların çoxu kişilərlə münasibətlərdə ağrılı təcrübələr yaşayıb, xəyanət, zorakılıq və s. Buna görə də bu mənfi ssenariləri minimuma endirmək üçün uzun illər çəkdiyi əziyyətin bəhrəsini özü və övladına saxlayır”.  

Sosioloq həmçinin vurğuladı ki, bu seçimin mənfi tərəfləri də var: uşaq yalnız anası tərəfindən böyüdülürsə, bu, sonradan onun sosiallaşmasına təsir edəcək.

Onsuz da təhsil müəssisələrində qadın müəllimlərin sayının artması, qadın valideynlərin üstünlük təşkil etməsi xüsusən də oğlan uşaqlarının xakarterinə təsir edib.

“Oğlanlarda iradə zəifliyi, küsəyənlik, az hərəkətlilik, evdarlığa meyl, bütün bunlar qadın tərbiyəsinin nəticəsidir. Belə uşaqlar tək valideyn modelini davam etdirəcəklər. Heç də müsbət tendensiya deyil. Amma bu problemdə qadınları mühakimə etməkdənsə, kişilərin ailədəki rolu, onların məsuliyyəti və iştirakı haqqında daha çox danışmaq vacibdir” - deyə o, əlavə edib.