Basqalda keramika sənətinin YAŞAYAN ÜNVANI - FOTO
Dünyanın bir çox turistik məkanlarında müxtəlif suvenir çeşidləri mövcuddur. Bu suvenirlər arasında ən qədim sənət nümunələrindən biri olan keramika bu gün də öz ənənəsini qoruyaraq müasir dövrlə uğurla uzlaşmaqdadır. Əsrlər boyu formalaşan bu sənət növü yalnız məişət əşyalarının hazırlanması ilə kifayətlənməyərək, eyni zamanda mədəni irsin və milli dəyərlərin gələcək nəsillərə ötürülməsində mühüm rol oynayır.
Xpress.az vetenbagi.az-a istinadla xəbər verir ki, bu ənənəni yaşadanlardan biri də "Basqal Craft" brendinin təsisçisi Bilal Hüseynovdur.
O, artıq 5 ildir ki, İsmayıllı rayonunun Basqal qəsəbəsində yerləşən qədim "Bazar meydanı"ndakı satış-emalatxanasında keramikadan hazırlanmış əl işlərinin hazırlanması və satışı ilə məşğuldur. Onun yaratdığı emalatxana qısa müddət ərzində həm yerli sakinlərin, həm də turistlərin diqqətini cəlb edən maraqlı məkanlardan birinə çevrilmişdir.
Basqala gələn yerli və xarici turistlərin böyük marağına səbəb olan bu məkan ənənəvi sənətkarlığın yaşadılması və təbliği baxımından xüsusi əhəmiyyət daşıyır. Burada hazırlanan keramika nümunələri yalnız bəzək əşyaları kimi deyil, həm də Basqalın zəngin tarixini, memarlıq üslubunu və milli ornamentlərini özündə əks etdirən sənət əsərləri kimi diqqət çəkir.
Emalatxananı ziyarət edən turistlər hər zövqə uyğun keramika məhsulları əldə etməklə yanaşı, Basqalın tarixi məkanlarını əks etdirən müxtəlif ölçülü suvenirləri də seçə, həmçinin fərdi sifarişlər verə bilərlər. Bu cür təşəbbüslər yerli sənətkarlığın qorunmasına, turizmin inkişafına və regionun daha geniş tanıdılmasına mühüm töhfə verir.
