Alimlərdən qlobal fəlakətlə bağlı xəbərdarlıq: Daha tez baş verəcək

Antarktidadakı şelf buzlaqları alimlərin gözlədiyindən daha sürətlə əriyə bilər.

Bu barədə yeni elmi araşdırmada bildirilib.

Tədqiqatın nəticələri milyonlarla insan üçün ciddi təhlükə yarada biləcək ssenarini ortaya qoyub.

Araşdırmanın rəhbərlərindən biri olan Çin Çjou bildirib ki, əsas qlobal nəticə dəniz səviyyəsinin daha sürətli yüksəlməsi olacaq: “Antarktida gələcəkdə dəniz səviyyəsinin yüksəlməsi üçün ən böyük potensial mənbəni özündə saxlayır”.

Alimlərin sözlərinə görə, Antarktidadakı şelf buzlaqları zəifləyir və ya dağılmağa başlayarsa, hazırda buz qalxanı tərəfindən saxlanılan nəhəng buz kütlələri okeana qarışacaq. Bu isə dünya okeanının səviyyəsinin kəskin artmasına səbəb ola bilər.

Mütəxəssislər hesab edir ki, buz qalxanının tam zəifləməsi halında dəniz səviyyəsi hətta 58 metrədək yüksələ bilər. Belə bir vəziyyət isə sahilyanı ərazilərdə yaşayan milyonlarla insan üçün daşqın təhlükəsi yaradacaq.

Qeyd edək ki, şelf buzlaqları qurudan dənizə doğru uzanan, su üzərində üzən və ya qismən dəniz dibinə söykənən nəhəng buz kütlələridir. Onlar əsasən materik buz örtüyünün davamı hesab olunur.