1 sentyabrdan məktəblərdə “Süni İntellekt” fənni TƏDRİS OLUNACAQ

Rusiyada məktəblərdə “Süni intellekt” fənni tədris olunacaq.

Xpress.az xəbər verir ki, Rusiyanın təhsil naziri Sergey Kravtsov bildirib ki, bu ilin 1 sentyabr tarixindən etibarən Rusiya məktəblərində yeni “Süni intellekt” kursunun tədrisinə başlanılacaq. Nazir bu barədə RIA Novosti agentliyinə müsahibəsində danışıb.

Onun sözlərinə görə, yeni fənn qabaqcıl informatika proqramının tərkib hissəsi olacaq və məktəblilərə süni intellekt texnologiyalarının əsaslarını öyrətmək məqsədi daşıyacaq.

Kravtsov qeyd edib ki, bu qərar may ayında yekunlaşan Ümumrusiya Məktəb Olimpiadası zamanı müşahidə olunan yüksək maraq və mövzunun aktuallığı nəzərə alınaraq qəbul edilib. Bildirilib ki, “Süni intellekt” istiqaməti əvvəlcə eksperimental proqram kimi tətbiq olunub və şagirdlər tərəfindən böyük maraqla qarşılanıb.

Nazirlik bundan əvvəl orta və ali məktəb şagirdləri üçün hazırlanmış “Süni İntellektə Giriş” adlı dərsliklər seriyasını federal tədris siyahısına daxil etməklə yeni proqram üçün ilkin baza formalaşdırmışdı.

Qeyd edək ki, Rusiya təhsil sistemində son dövrlərdə genişmiqyaslı dəyişikliklər həyata keçirilir. Daha əvvəl məktəblərdə vahid bədən tərbiyəsi standartlarının tətbiqi ilə bağlı da məlumat yayılmışdı.