Yayda uşaqlara bu qidaları verməyin - Həkimdən xəbərdarlıq

Uşaq qastroenteroloqu Yana Reyder yay aylarında uşaqlarda bağırsaq infeksiyaları və qida zəhərlənməsi riskinin artdığı barədə xəbərdarlıq edib. Bu barədə Gazeta.ru məlumat yayıb.

Həkimin sözlərinə görə, isti hava şəraiti qidaların daha tez xarab olmasına səbəb olur və uşaqların həssas mədə-bağırsaq sistemi bu riskləri daha da artırır.

Reyder bildirib ki, yayda xüsusilə ət məhsulları, süd məhsulları, salatlar, yumurta və müxtəlif bişmiş qidalar təhlükəli hesab olunur. Hətta bu məhsulların qısa müddət ərzində soyuducudan kənarda qalması belə bakteriyaların sürətlə çoxalmasına şərait yarada bilər.

Mütəxəssis yağlı və qızardılmış yeməklərin, hisə verilmiş ətlərin, kolbasa məhsullarının, kremli desertlərin və şirniyyatların istifadəsini məhdudlaşdırmağı tövsiyə edib. Onun sözlərinə görə, bu cür qidalar qida zəhərlənməsinə səbəb ola bilər.

Bundan əlavə, şəkərli qazlı içkilər, qablaşdırılmış şirələr, qəhvə və kakao da yay aylarında uşaqlar üçün uyğun hesab edilmir. Həkim qeyd edib ki, bu içkilər susuzluğu aradan qaldırmır və orqanizmdə su-mineral balansının pozulmasına gətirib çıxara bilər.

Qida zəhərlənməsi və ya bağırsaq infeksiyasının əsas əlamətləri arasında ürəkbulanma, qusma, qarın ağrısı, ishal, yüksək hərarət, halsızlıq və iştahsızlıq göstərilir.

Həkim vurğulayıb ki, əgər uşaqda təkrarlanan qusma, tez-tez ishal, yüksək hərarət və ya maye qəbul edə bilməmə halları müşahidə olunarsa, dərhal tibbi yardıma müraciət etmək lazımdır.