Mallı Şıxlı məktəbində İlqar Quliyevin yubileyinə həsr olunmuş esse müsabiqəsi keçirilib
Göyçay rayonunun Mallı Şıxlı kəndində yerləşən Qafur Səmədov adına tam orta məktəbdə təqdirəlayiq təşəbbüs həyata keçirilib.
Məktəbin məzunu, polkovnik-yazıçı İlqar Quliyevin 70 illik yubileyi münasibətilə məktəbdə esse müsabiqəsi təşkil olunub. Müsabiqənin məqsədi şagirdlərdə vətənpərvərlik hisslərinin gücləndirilməsi, ədəbiyyata marağın artırılması, həmçinin tanınmış məzunun həyat və yaradıcılığının təbliği olub.
Müsabiqənin yekununda qaliblərin mükafatlandırılması mərasimi keçirilib. Tədbirdə Göyçay rayonunun ziyalıları, İlqar Quliyevin keçmiş iş yoldaşları, müəllimlər və şagirdlər iştirak ediblər.
Çıxış edənlər İlqar Quliyevin Vətən qarşısındakı xidmətlərindən, hərbi və ədəbi fəaliyyətindən bəhs edərək onun gənc nəslə örnək olan şəxsiyyət olduğunu vurğulayıblar. Müsabiqə qaliblərinə diplom və hədiyyələr təqdim olunub.
Tədbir iştirakçıları belə maarifləndirici və vətənpərvərlik ruhunda keçirilən layihələrin davamlı xarakter almasının vacibliyini qeyd edərək, bu cür təşəbbüslərin gənclərin milli-mənəvi dəyərlərə bağlılığının möhkəmləndirilməsində mühüm rol oynadığını bildiriblər.
