Misir Mərdanov: "Abituriyentlərə sual hazırlayanların özləri yoxlanılmalıdır"

 Araşdırmalar göstərir ki, son illərdə abituriyentlərin qəbul imtahanlarında topladığı ballarda əvvəlki illərlə müqayisədə azalma müşahidə olunur. Bəzi ekspertlər bunu məktəblilərin mobil telefon və digər texnoloji vasitələrdən asılılığı, eləcə də imtahan suallarının həddindən artıq çətin olması ilə əlaqələndirirlər.

Məsələ ilə bağlı sabiq təhsil naziri Misir Mərdanov Xpress.az-a açıqlama verib.

“Bu sahədən uzaq olmağıma baxmayaraq, cəmiyyətdə gedən müzakirələrə və sosial şəbəkələrdə səsləndirilən fikirlərə əsaslanaraq apardığım müşahidələr göstərir ki, imtahan sualları getdikcə çətinləşdirilir. Zənnimcə, əsas səbəb də məhz budur.

Buna görə də hər il müəyyən maddi imkanı olan ailələrin övladlarının böyük hissəsi təhsil almaq üçün xaricə üz tutur”, – deyə o bildirib.

Problemin həlli yollarına gəlincə, sabiq nazir fikirlərini belə ifadə edib:

“Sualları hazırlayan və qiymətləndirən şəxslərin fəaliyyəti də qiymətləndirilməlidir. Onlar müstəntiq deyillər ki, insanların övladlarını sorğu-suala tutsunlar. Onların işi də obyektiv şəkildə dəyərləndirilməlidir.

Artıq 30 ildir ki, bu sistem tətbiq olunur. Bu 30 il ərzində Azərbaycandan neçə görkəmli alim yetişib? 600-dən yuxarı bal toplayan məzunların sonrakı fəaliyyəti və ya hazırda harada olmaları barədə sistemli məlumat varmı? Təəssüf ki, yoxdur.

Bütün bunlar nəzərdən keçirilməli, imtahan suallarını hazırlayanların fəaliyyətinə qiymət verilməli və əldə olunan nəticələr hər il ictimai müzakirəyə çıxarılmalıdır”, – deyə Misir Mərdanov fikrini tamamlayıb.

Afaq Qurbanzadə