Xaçmazda Peşə Təmayüllü Sinif Şagirdləri İmtahanlarda Yüksək Nəticə Göstərdilər
Xaçmaz rayonu Şəmsəddin Sədiyev adına Qımılqışlaq kənd tam orta ümumtəhsil məktəbinin X və XI peşə təmayüllü sinif şagirdləri nəzəri və praktik imtahanlardan uğurla keçiblər.
Bu uğur şagirdlərin tədris ili ərzində əldə etdikləri bilik və bacarıqların göstəricisi olmaqla yanaşı, onların gələcək peşə həyatına hazırlıqlı şəkildə addım atdıqlarını nümayiş etdirir. İl ərzində şagirdlər müxtəlif peşə istiqamətləri üzrə həm nəzəri biliklərə yiyələnib, həm də praktik bacarıqlar qazanıblar.
Peşə təmayüllü siniflər şagirdlərdə əmək vərdişlərinin formalaşmasına, məsuliyyət hissinin artmasına, peşəyə maraq və həvəsin güclənməsinə mühüm töhfə verir. Bu istiqamətdə aparılan işlər gənclərin bacarıqlarının üzə çıxarılmasına, onların gələcək peşə seçiminə dəstək göstərilməsinə xidmət edir.
Təhsil prosesində şagirdlər yalnız dərs otaqları ilə kifayətlənməyərək praktik məşğələlərdə, təcrübə səfərlərində, müxtəlif tədbirlərin təşkili, yarışlar və satış sərgilərində fəal iştirak ediblər. Həmçinin idarə və müəssisələrə təşkil olunan ekskursiyalar zamanı iş mühiti ilə yaxından tanış olub, müxtəlif peşələrin xüsusiyyətləri barədə ətraflı məlumat əldə ediblər.
Mütəxəssislərin fikrincə, peşə təmayüllü siniflər gənclərin asudə vaxtlarının səmərəli təşkilinə, onların sağlam düşüncəli və məqsədyönlü fərd kimi formalaşmasına da müsbət təsir göstərir. Bu istiqamət şagirdlərin cəmiyyətə faydalı və peşəkar kadrlar kimi yetişməsində mühüm rol oynayır.
Təhsil işçiləri hesab edirlər ki, məktəblərdə peşə təmayüllü siniflərə marağın artırılması, bu sahənin daha geniş təbliği və dəstəklənməsi gələcəyimizin təminatı olan gənclərin uğurlu inkişafına xidmət edəcək. Müəllim və valideynlərin birgə əməkdaşlığı nəticəsində şagirdlərin düzgün istiqamətləndirilməsi, onların bacarıqlarının inkişaf etdirilməsi və peşəkar kimi formalaşması Azərbaycanın gələcək inkişafına mühüm töhfə verəcək.
Bu gün peşə bacarıqları qazanan hər bir şagird sabah ölkənin sosial-iqtisadi inkişafında fəal iştirak edən layiqli vətəndaş kimi cəmiyyətə xidmət göstərəcək.
